Leer ons ken deur die boeke wat ons lees! Vandeesmaand gesels ons met Elzette Wickens, ʼn taalpraktisyn by die Taalsentrum se Taaldiens. “Ek redigeer en vertaal tekste vir Universiteits- en eksterne kliënte, in Afrikaans en Engels. Ek leer byna elke dag iets omdat ek met inhoud uit soveel uiteenlopende velde werk.”
Elzette hanteer ook taalnavrae vanaf kliënte sowel as niekliënte. “Dít kan nogal ʼn skattejag raak, want mense kontak ons meestal oor probleemgevalle waarvoor hulle nie elders sommerso oplossings kon kry nie. Ek is op my gelukkigste as ek kan voel ek het ʼn goed versorgde teks gelewer of ek het die taai bondel van ʼn taaltameletjie losgewoel gekry.”
Wat is die titel van jou gunstelingboek, of ʼn boek wees wat ʼn diep indruk op jou gemaak het, of ʼn boek wat jy om die een of ander rede as onvergeetlik ervaar het?
The Christmas Mystery deur Jostein Gaarder (die outeur van Sophie’s World).
Hoekom het hierdie boek jou só beïndruk?Ek het nog nooit voorheen so ʼn boek gelees nie. Dis ʼn storie waarin die spanning byna ongemerk opbou, met parallelle verhaallyne wat in teenoorgestelde rigtings beweeg. Enersyds is daar ʼn fantasieverhaal wat nietemin die verloop van die werklike geskiedenis volg; andersyds ʼn verhaal in die “werklike wêreld” met “gewone mense”. Maar dalk is eersgenoemde die werklikheid, wat ons een venstertjie op ʼn slag begin raaksien? Dis ʼn meesleurende karnaval sowel as stof tot nadenke. Een van die min boeke wat ek meer as een keer herlees het.
Wie is jou gunstelingouteur(s)? Hoe só?
Somerset Maugham, wat emosie so kan vasvang dat dit jou eie gemoed binnesypel. PG Wodehouse, vir die fyn spot met sosiale konvensies sonder om geniepsig te wees. Ken Follett, vir sy lieflike reeks wat in die Middeleeuse Engeland en Frankryk afspeel, vol kastele en kloosters en swaarde. Bill Bryson, vir die manier waarop hy inligting en aweregse humor vervleg, maar bowenal vir sy Mother Tongue, wat een van my grootste gunstelinge is. Hergé se Kuifie-reeks en Alba Bouwer se Rivierplaas-reeks. Die wenners wat saamgaan na die spreekwoordelike verlate eiland is Dr Seuss en Astrid Lindgren; as ek met hulle uitgekuier geraak en hulle boeke ontgroei het, kan julle maar die ligte afskakel.
Dr Seuss se Cat in the Hat-karakter (kopiereg: Random House)
Wat lees jy op die oomblik?
Ek lees nooit net een boek op ʼn slag nie. Op die oomblik is daar boekmerke in The Missing Ink: How handwriting made us who we are, The Queen’s Gambit, My Life with BoB: Flawed heroine keeps book of books, plot ensues, en Common Places: Mythologies of everyday life in Russia. Plus nog ʼn paar, hier en daar.
Verkies jy dit om ‘regte’ gedrukte boeke te lees, of lees jy eerder boeke op ʼn Kindle of ʼn ander elektroniese platform? Wat is die rede vir jou voorkeur?
Ek is ʼn verbaasde maar heelhartige Kindle-aanhanger. Ek lees net nuusartikels op ander toestelle, en gedrukte boeke net as die fotomateriaal daarin belangrik is. Hoekom sou jy ʼn swaar voorwerp wou vashou, dalk jou plek wou verloor, nie dadelik ʼn vreemde of interessante woord wou naslaan nie, nie treffende gedeeltes moeiteloos wou onderstreep nie, nie ʼn ingeboude leeslampie wou hê nie … en nie ál die boeke waarin jy tans lees, tegelykertyd byderhand wou hê nie?
Reis lig en red ’n boom!”
Watter boek het jy al meer as een keer gelees? Vertel ons hoekom?
Jane Austin se werk, veral Pride and Prejudice – seker al agt keer. Ek jil elke keer van plesier. Daardie openingsreël …
Wie is jou gunsteling- literêre karakter?
Kaptein Sardyn
Het jy dalk ʼn lewensles uit ʼn boek of by ʼn karakter uit ʼn boek geleer wat jy met ons wil deel, as jy dit nog nie in een van jou ander antwoorde genoem het nie?
Niemand hou by CS Lewis kers vas nie. Maar ek glo nie dis die regte forum hiervoor nie.
Watter boek of boeke kan jy by jou vriende, studente en enige iemand anders aanbeveel?
Die lys is nimmereindigend, want ek lees meestal oor onderwerpe wat vir my interessant klink, eerder as die werk van sekere skrywers. ʼn Paar:
- Worldly Goods: A new history of the Renaissance (Lisa Jardine)
- C’est La Folie (Michael Wright; ʼn Engelse boek, net die titel is Frans)
- Travels With My Briefcase (Peter Biddlecombe)
- Sixty Million Frenchmen Can’t Be Wrong: Why we love France but not the French (Jean Nadeau & Julie Barlow)
- Rationality: What it is, why it seems scarce, why it matters (Steven Pinker)
- Shantaram (Gregory David Roberts)
- Sy Kom met die Sekelmaan (Hettie Smit)
- Hessie en Holderstebolder (Korky Paul & Valerie Thomas)
- Zanzibarstraat (Niki Daly)
