As jy – soos menige Woordfeesaanhangers – al ʼn oog gegooi het oor vanjaar se Woordfeesgids, sou jy moontlik afgekom het op die Taalsentrum se advertensie en wenke oor hoe om die pad in Xhosa te vra. Die bladsy sluit af met dié leuse: Wonderlike dinge gebeur as jy saam met ons werk. Die Woordfees werk inderdaad weer saam met ons vanjaar: Om te sorg vir intydse tolking as die tonge klap by die diskoersreeks.
Die Woordfees skop vanjaar af op 5 Maart, en buiten die teater-, skrywers- en musiekfeeste is daar verskeie gespreksessies waar die sprekers die gehoor sal aanmoedig om saam te praat. Om daardie kommunikasiegeleenthede te verryk, sal daar Taalsentrum-tolke by verskeie van hierdie sessies wees om gratis te tolk na (hoofsaaklik) Engels of Afrikaans.
Eduard de Kock, een van die Taalsentrum se tolke, onthou toe hierdie inisiatief in 2018 begin is: “Dit was so ʼn fassinerende en opwindende versoek. Daar was ʼn reeks gesprekke wat elke dag in die tent voor Wilgenhof plaasgevind het. Ons moes ʼn piekniekbankie kry, tolk-toerusting uitdeel en dan die interessante en nogal emosionele getuienis tolk – én die drang weerstaan om nie self betrokke te raak nie! Woordfeestolking het ʼn geleentheid geword waarna ek regtig uitsien.”
Weens logistieke redes is daar nie tolking by alle diskoersreekse nie, maar die kans is goed dat jy ʼn tolk iewers sal teëkom. Wees op die uitkyk vir mense met ʼn gereedskapstas, gewoonlik naby die verhoog, en tipies met ʼn glimlag op hul gesigte. Kom groet en maak gerus gebruik van die gratis diens. Voorspoedige Woordfees!
