“Hierdie jaar het ons net ʼn halwe boks boeke opgepak ná die Boektsunami,” vertel dr Vernita Beukes, ʼn Taalsentrum-dosent en organiseerder van die Sentrum se jaarlikse Boektsunami, wat vanjaar op Vrydag 6 September plaasgevind het.
Die Boektsunami is ʼn knik in die rigting van Britse aktrise Emma Watson se Book fairy-projek, wat mense aanmoedig om boeke in openbare plekke te los sodat ander dit kan kry, lees en weer iewers vir ʼn volgende leser los. Vanjaar is die derde jaar dat Vernita en ander Taalsentrumkollegas die Neelsie-studentesentrum op horings neem met boeke. “Ons pak die boeke vroeg-vroeg oral uit om almal wat ʼn draai daar maak vir die eerste koffie van die dag, sommer met ʼn boek ook te verras.” Die Boektsunami word elke jaar so naby moontlik aan 8 September, Internasionale Geletterdheidsdag, gehou. Vanjaar se tema is geletterdheid en veeltaligheid.
“So gee ons iets terug aan die gemeenskap én vier ons ʼn belangrike internasionale dag,” verduidelik Vernita. Die Taalsentrum is verder betrokke by sy gemeenskap deur ʼn voorleesprojek vir kleuterskole in Stellenbosch en die omliggende Cloetesville, Idasvallei, Jamestown, Kylemore en Pniel. “Ons is nie altyd seker wie dit die meeste geniet nie, die voorlesers of die kinders!”
Leesvreugde is aansteeklik. Probeer dit gerus! Jy kan vir Vernita kontak om by die voorleesprojek aan te sluit, of dalk kan jy daarby baat om saam met ons Leeslab te werk. Die Taalsentrum se Leeslab kan volwasse lesers help om vinniger en slimmer te lees – of die leesmateriaal nou sakeverslae, akademiese artikels of handboeke is. E-pos vir Marisca Coetzee vir meer besonderhede oor wat die Leeslab bied.
