Leer ons ken deur die boeke wat ons lees! Vandeesmaand gesels ons met Vicki Fourie. Vicki is ʼn tolk en koördineer die Taalsentrum se portefeulje vir Suid-Afrikaanse gebaretaaltolking. Sy is ook ʼn fasiliteerder vir akademiesegeletterhede-modules. Sy is ʼn boorling van die Oos-Kaap, en sê: “My hart hunker altyd na natuurskoon, sonsopkomste en sonsondergange, berge en vryheid.”
Wat is die titel van jou gunstelingboek, of ʼn boek wees wat ʼn diep indruk op jou gemaak het, of ʼn boek wat jy om die een of ander rede as onvergeetlik ervaar het?
Dis ʼn onmoontlike vraag om te beantwoord, maar ek gaan volstaan met Gone with the Wind deur Margaret Mitchell.
Hoekom het hierdie boek jou só beïndruk?
Ek is gek oor Amerikaanse literatuur: Mark Twain, Harper Lee, Louisa May Alcott en selfs Louis L’Amour (nou weet julle régtig alles van my), maar Margaret Mitchell se epiese verhaal was vir my onvergeetlik. Die kombinasie van romanse, geskiedenis en avontuur is alles wat ʼn goeie storie vereis, en dis allereers die rede waarom ek lees – vir goeie stories!
Wie is jou gunstelingouteur(s)? Hoe só?
Op die oomblik is dit Chimamda Ngozi Adichie. Haar feminisme en eerlike stories oor gemarginaliseerdes in die samelewing is so eg dat hulle nie anders kan as om ʼn mens aan te gryp en tot jou te spreek nie.
Wat lees jy op die oomblik?
David Copperfield deur Charles Dickens (weer), en When helpling hurts deur Steve Corbertt en Brian Fickert (vir die eerste keer). Ek luister ook tans na John Bunyan se Pilgrim’s Progress as ʼn oudioboek. Ek hoop dit tel!
Verkies jy dit om ‘regte’ gedrukte boeke te lees, of lees jy eerder boeke op ʼn Kindle of ʼn ander elektroniese platform? Wat is die rede vir jou voorkeur?
Ek het onlangs eers die wonder van ʼn Kindle ontdek! Hoe heerlik om op jou rug te kan lê en lees sonder om ʼn lomp boek vas te hou, en om onbeperkte hoeveelhede boeke tot jou beskikking te hê (ek lees selde net een boek op ʼn slag). Nietemin bly my boekrak met sy boeke waarskynlik my kosbaarste besitting.
Watter boek het jy al meer as een keer gelees? Vertel ons hoekom?
Die meeste boeke moet meer as een keer gelees word, maar die boeke wat ek seker al die meeste gelees het, is die hele Asterix-reeks – ek dink ek ken hulle waarskynlik almal uit my kop! Ons het die reeks in my ouerhuis gehad en dis waar ek my liefde vir lees ontdek het.
Wie is jou gunsteling- literêre karakter?
Asterix! Nee, darem nie. Dit sal Scout Finch uit To kill a Mockingbird deur Harper Lee moet wees:
“Atticus told me to delete the adjectives and I’d have the facts.”
Maar nou dat ek weer daaroor dink: Dalk moet dit Atticus Finch wees …
Het jy dalk ʼn lewensles by ʼn boek of ʼn karakter uit ʼn boek geleer wat jy met ons wil deel, as jy dit nog nie in een van jou ander antwoorde genoem het nie?
Die boek A Thousand Gifts deur Ann Voskamp is nie die eerste boek wat my lewensfilosofie verander het nie, maar wel die mees onlangse. By Ann Voskamp het ek geleer dat danksegging wonderwerke voorafgaan. Om die lewe deur ʼn bril van dankbaarheid te aanskou, stel jou in staat om die wonder daarvan in al sy volheid te ervaar.
Thanksgiving precedes the miracle.” – Ann Voskamp
Watter boek of boeke kan jy by jou vriende, studente en enige iemand anders aanbeveel?
Baie! Elke boek pas op ʼn spesifieke tyd by ʼn spesifieke mens. Die boek Little Paris Bookshop deur Nina George handel juis oor die eienaar van ʼn ‘boeke-apteek’ wat boeke voorskryf vir geestelike, emosionele en fisieke kwale. Ek dink dis ʼn briljante idee om boeke as medisyne te gebruik.
Hier is my voorskrif (gebruik soos benodig):
- A Thousand Gifts deur Ann Voskamp – as dit voel of swaarkry jou onderkry.
- When helping hurts deur Steve Corbett en Brian Fikkert – wanneer ander se swaarkry jou onderkry.
- Come and eat deur Bri McKoy – hoe om ten spyte van swaarkry te kan feesvier.
