Leer ons ken deur die boeke wat ons lees!
Vandeesmaand gesels ons met Susan Lotz. Sy is ʼn taalpraktisyn en inhoudskoördineerder by die Taalsentrum. “Onder andere koördineer ek inhoud en boodskapoordrag by die Taalsentrum om ʼn bewustheid van die Sentrum se bedrywighede aan te wakker en om meertaligheid aan die Universiteit te bevorder,” verduidelik sy.
Wat is die titel van jou gunstelingboek, of ʼn boek wat ʼn diep indruk op jou gemaak het, of ʼn boek wat jy om die een of ander rede as onvergeetlik ervaar het?
Daar is baie sulke boeke omdat ek groot genot put uit lees, maar die een wat ek vandag met julle wil deel, is The Cello Suites deur Eric Sieblin.
Wat is die titel van jou gunstelingboek, of ʼn boek wat ʼn diep indruk op jou gemaak het, of ʼn boek wat jy om die een of ander rede as onvergeetlik ervaar het?
Daar is baie sulke boeke omdat ek groot genot put uit lees, maar die een wat ek vandag met julle wil deel, is The Cello Suites deur Eric Sieblin.
Hoekom het hierdie boek jou só beïndruk?
Van alle musiek luister ek die heel graagste na tjellomusiek en Johann Sebastian Bach is een van my gunstelingkomponiste. Hierdie boek is enersyds ʼn ode aan die tjello en andersyds ʼn mymering oor Bach en die omstandighede waaronder sy tjellosuites (waarvan ek vreeslik hou) neergeskryf is; dit was dus vir my ʼn louter vreugde om die boek te lees! Ook het dit die Katalaanse tjellis, Pablo Casals, aan my bekendgestel, wat op sigself ʼn wonderlike ontdekking was omdat dit my nog uitsonderlike musiek gegee het waarin ek my kan verlustig. Die boek is glad nie tegnies nie, dis goed geskryf en dis boeiend – die outeur weef verskeie storielyne saam en dus is dit moeilik om dit neer te sit! Dis ʼn ware fees van ʼn musikale reis wat op ’n diep vlak met my geresoneer het.
Wie is jou gunstelingouteur(s)? Hoe só?
Ek dink dit hang af van op watter plek ek my bevind – ek het boeke deur skrywers soos Ingrid Winterbach, Lien Botha, Deon Meyer, Stieg Larsson, Laurie R King, Margaret Atwood, Jeanette Winterson, Neil Gaiman en Terry Pratchett al baie geniet. Ek het die Game of Thrones-boeke deur George RR Martin verslind, en verkies die boeke bó die verfilmde reeks. Twee Ierse outeurs na wie ek telkens terugkeer, is Niall Williams en Maggie O’Farrel.
Wat lees jy op die oomblik?
Where the Crawdads Sing, deur Delia Owens, en Skepsel deur Willem Anker (ʼn herlees omdat ek die Afrikaans waarin hierdie boek geskryf is, so geniet).
Verkies jy dit om ‘regte’ gedrukte boeke te lees, of lees jy eerder boeke op ʼn Kindle of ʼn ander elektroniese platform? Wat is die rede vir jou voorkeur?
Gedrukte boeke wen elke keer. Ek bestee soveel tyd daaraan om as deel van my werk en my lewe woorde op rekenaarskerms te lees dat dit vir my ʼn groot lekkerte is om woorde op papier te lees. Maar ek is aanpasbaar – as ek op my tablet toegang tot ʼn boek het, sal die tablet aan my sy bly totdat ek die boek klaar gelees het. Ek moet egter erken dat ek nogal hou van die idee dat minder bome afgekap word. Om dié rede koop eerder tweedehandse boeke, indien moontlik, of ek leen ʼn boek by iemand.
Watter boek het jy al meer as een keer gelees? Vertel ons hoekom?
The Cello Suites, om dit weer van voor af te geniet en omdat dit onmoontlik is om tydens die eerste lees al die inligting in te neem of te onthou; en Minoes, omdat dit so ʼn prettige boek is! Ook af en toe ʼn Harry Potter-boek (JK Rowling), om my geheue te verfris oor wie waar inpas, om terug te dink aan waar ek was toe ek hulle die eerste keer gelees het, en om met my niggies oor die stories en karakters te gesels. Four Letters of Love deur Niall Williams net omdat dit so dromerig is en dit voel asof ʼn mens saam met die karakters op die Ierse platteland is terwyl jy die storie lees. Ek soek boeke wat iets spesiaals vir my gedoen het, weer op.
Wie is jou gunsteling- literêre karakter?
Minoes (in Minoes deur Annie MG Schmidt, die Afrikaanse vertaling van die oorspronklike Nederlands). Minoes is ʼn kat en ʼn meisie – dikwels gelyktydig!
Het jy dalk ʼn lewensles by ʼn boek of ʼn karakter uit ʼn boek geleer wat jy met ons wil deel, as jy dit nog nie in een van jou ander antwoorde genoem het nie?
ʼn Karakter soos Salander in The Girl with the Dragon Tattoo inspireer my en daag my uit om dapper te wees en te hanteer wat ook al hanteer moet word, en herinner my daaraan dat dit heeltemal in orde is om eksentriek te wees.
Dit hang net af of ʼn mens ontvanklik daarvoor is – of jy dié waarhede kan absorbeer of werklik hóór.”
Watter boek of boeke kan jy by jou vriende, studente en enige iemand anders aanbeveel?
Ja, hier is ʼn paar musiekstories:
The Cello Suites deur Eric Sieblin
A Genius in the Family deur Hilary en Piers du Pré
An Equal Music deur Vikram Seth (daar is selfs ʼn amptelike kompilasie op CD van al die stukke wat in die boek genoem word en dis waarskynlik ook op musiekstromingsdienste beskikbaar)
As It is in Heaven deur Niall Williams (met baie Vivaldi)
The Concert Pianist deur Conrad Williams
En nog ʼn paar aanbevelings:
The Little Prince deur Antoine de Saint Exupéry
Four Letters of Love deur Niall Williams
My Dream of You deur Nuala O’Faolain
After You’d Gone deur Maggie O’Farrel
The Girl with the Dragon Tattoo-trilogie deur Stieg Larsson
The Game of Thrones-boeke deur George RR Martin
The MadAddam-trilogie deur Margaret Atwood
Folly deur Laury R King
Extremely Loud and Incredibly Close deur Jonathan Safran Foer
Lighthousekeeping deur Jeanette Winterson
Forests of the Heart deur Charles de Lindt
Good Omens deur Terry Pratchett en Neil Gaiman
Die Witches-trilogie deur Terry Pratchett (en daarna sal jy ʼn slaaf wees!)
En iets in Afrikaans:
Skepsel deur Willem Anker
Die Aanspraak van Lewende Wesens deur Ingrid Winterbach
Wonderboom deur Lien Botha
Verlorenkop deur Celesté Fritze
