Category: Iindaba zakutsha-nje

Amaziko okubhala njengeendawo zokuphelisa ubukoloniyali

Ngomhla we-4 kweyeDwarha, intloko yethu yeLebhu yase-SU yokuBhala, uRose Richards, waye wazimasa inkomfa yezifundo eyayisingathwe ngobuxhaka-xhaka bale mihla kwi-intanethi neyayimalunga nokupheliswa kobukoloniyali kumaziko okubhala aseMzantsi Afrika. Wabelana nathi ngeengcinga zakhe malunga naloo nkomfa yezifundo.

Njengomsebenzi wakwiziko lokubhala, ndivuya kakhulu ukubona abanye abasebenzi bakumaziko okubhala kwilizwe jikelele besabelana ngeembono zam malunga namandla amaziko okubhala okutshintsha imbonakalo yezemfundo.

La nkomfa ndandiyizimasile yayisingathwe yiYunivesithi yeTekhnoloji yaseThekwini, iYunivesithi yeTekhnoloji yaseCape Peninsula neYunivesithi yeTekhnoloji yaseMangosuthu. Yayingumsitho wokuqala wamaziko okubhala owawusingathwe ziiyunivesithi zetekhnoloji kwaye ndandinemincili yokubona oko kwakuya kutshiwo ngabo babeya kuprezenta. Umxholo wawuthembisa ukuvusa ingxoxo ezinzima kwaye andizange ndibe nakudaniswa.

Ukupheliswa kobukoloniyali ngumxholo ovusa umnyele kwabaninzi kwaye ngenxa yoko, abantu abakuphengululi okona kuthethwa ngulo mxholo ngokwenene. Sisindululo esithi ‘akunakwenziwa oku kungenziwa okuya’ apho iinqobo zezithethe zaseYurophu zilahlwayo ukuze kusetyenziswe ezase-Afrika. Sisindululo esithi ‘zombini … nakunye’, esineengcambu ezimiliselwe kubulungisa bangokwentlalo nokusetyenziswa kwentando yesininzi. Ukuba ufuna ukucakacwa okuhle kwentsingiselo namandla okupheliswa kobukoloniyali, thathela ingqalelo ukuba ufunde eli phepha lika Njing Gift Mheta, omnye wezithethi, neli likaSavo Heleta (Nceda ujonge iinkcukacha ezipheleleyo ekupheleni kweli nqaku).

Ulwimi, ukuchithwa kwamanqwanqwa emigangatho yobomi nobuntu yayiyimixholo eyayingumongo wezo ngxoxo. Ukufunda kwilizwe elineelwimi ngeelwimi ngomnye umngeni abathi abafundi baseMzantsi Afrika bajongane nawo. Ngenxa yoko, abasebenzi bakumaziko okubhala bavamise ukusebenzisa utshintshwano lweekhowudi nokuxuba iilwimi xa bethethana nabafundi. Le yenye indela yokunika abafundi amandla nokudala ithuba lokuba abafundi bazivakalise.

Indlela yokutyhutharishana koontangandini neendlela zokuziphatha zeziko lokubhala zokwamkela wonke ubani nokungagwebi mntu zidala indawo esebenza ngentando yesininzi nangakumbi nalapho abafundi banokuzilungiselela ububona bangokwezifundo kwaye benze iimpazamo ngaphandle kokugxekwa. Abafundi abanikwa sithi ilizwi labo – sele benawo kakade amazwi, koko thina siyabanceda ekubeni bawaphuhlise amazwi abo baze bafumane iindlela zokuba bavakale.

Ezi nezinye iindlela ezisetyenziswa kumaziko okubhlala ziyinxalenye yoko kwaziwa eMzantsi Afrika njengobuntu. UBaken Lefa, umphandi wezifundo zenzululwazi, uchaza ubuntu njengamandla omoya athi “avakalise uvelwano, imbuyiswano, isidima, imvisiswano nobuntu ngeenjongo zokwakha nokugcina uluntu olunobulungisa nenkathalo omnye ngomnye”. Ngokokwam ukubona, loo mandla aluqilima kumaziko okubhala.

[us_hwrapper]

Yayingoobani izithethi?

[us_cta title=”” btn_label=””]UNjing Mheta (weYunivesithi yeTekhnoloji yaseThekwini) waye wathetha ngomxholo othi ‘Towards decolonised writing centre spaces: ‘The reflections-for-action of a DUT Writing Centre practitioner’. UNjing Mheta yintloko yeziko lokubhala lase-DUT. Izinto elugxila kuzo uphando lwakhe zimbaxa, zinika ingqwalasela kuphuhliso nononotshelo lweekhopasi, ukubhala okungeekhompyutha nokusetyenziswa kweetekhnoloji zeelwimi ukuphuhlisa iilwimi zase-Afrika. [/us_cta][/us_hwrapper]

[us_cta title=”” btn_label=””]UNkszn Puleng Sefalane-Nkohla (weYunivesithi yeTekhnoloji yaseCape Peninsula) waye wendlala umxholo othi ‘Being and Becoming: Decolonising the Writing Centre space. How do We Decolonise Students’ Academic Support at CPUT?’. UNkszn Sefalane-Nkohla ulibambela lentloko yesebe leYunithi yokuFunda kwaBafundi kwiZiko lase-CPUT leMfundo ePhakamileyo noPhuhliso iFundani. Sele esebenze kumaziko okubhala iminyaka engama-22 kwaye unobudlelwane beminyaka engama-20 kunye neLebhu yokuBhala yase-SU. Umsebenzi wakhe ugxila kuncwadi lwezifundo, kunye nolwimi netekhnoloji.[/us_cta]

[us_cta title=”” btn_label=””]Isithethi sokugqibela, uMnu Ntuthuko Mhlongo (weYunivesithi yeTekhnoloji iMangosuthu), waye wathetha ngomxholo othi ‘Location and Power: Appraising the opportunities and challenges for writing centres as spaces for transformation and decolonisation in the South African university context’. UMnu Mhlongo wayiqala indlela yakhe yokubhala e-DUT. Kungoku nje usebenza kwizifundo zakhe zesidanga sobuGqirha (PhD), nezimalunga nemingeni eluthi ulutsha lwasemaphandleni lujongane nayo eMzantsi Afrika. Uphando lwakhe lugxila ekuphuhliseni ulutsha ngokujoliswe ekutshintsheni kwemeko-bume yehlabathi jikelele kwaye umdla wakhe kumaziko okubhala umalunga nendlela enye yokufezekisa oko.[/us_cta]

– nguRose Richards (uguqulo lolwimi lwenziwe ngu Siphumeze Mrwetyana noZama Bekweni)

Amanqaku akhankanyiweyo

Heleta, Savo. 2016. Decolonisation: academics must change what they teach, and how. The Conversation. https://theconversation.com/decolonisation-academics-must-change-what-they-teach-and-how-68080

Lefa, Baken. 2015. The African Philosophy of Ubuntu in South African Education. Studies in Philosophy and Education 1(1):15.

Mheta, Gift, Lungu, Bwalya Nyangu, & Govender, Thaiurie. 2018. Decolonisation of the curriculum: A case study of the Durban University of Technology in South Africa. South African Journal of Education, 38(4), 1-7. https://dx.doi.org/10.15700/saje.v38n4a1635

18 November 2021Tags: decolonisation, peer tutoring, student voices, ubuntu, writing centres, Writing Lab

Ukunwenwa kweziphumo zolwimi

Uninzi lwethu alucingi kangako malunga nolwimi ngokwengqiqo ekuphileni kwethu ubomi bethu bemihla ngemihla. Kwaye noko kunjalo, ulwimi esilusebenzisa kwizifundo zethu, kwiimeko zasemisebenzini nakubudlelwane bethu buqu nabanye abantu lulo olwakha uhlobo lokuqonda ubuthina, uhlobo esithanda ukuba lulo ehlabathini, kunye noko kukokona kubaluleke kakhulu kuthi.

Indlela esinxibelelana ngayo inefuthe kwaye iyakutshintsha okusingqongileyo, nto leyo idala amaza anwenwayo kubomi bethu jikelele.

Kodwa asiyazi sonke indlela yokukwenza kakuhle oko, kwaye siyalibala ukuba unxibelelwano alukho malunga noko sikuthethayo kuphela, kodwa lukwamalunga nendlela okuvakala ngayo oko sikuthethayo, kananjalo nomntu lowo ukuvayo oko sikuthethayo. Sonke sineendlela ezahlukahlukeneyo zokucinga nokuqonda, kwaye sineemvelaphi namava ahlukahlukeneyo.

Ngoko ke, ukuphucula unxibelelwano akukho malunga nokwandisa amagama owaziyo nowasebenzisayo nokuchula usetyenziso lweempawu zokwakha izivakalisi ngokufanelekileyo nje kuphela. Kumalunga nokuqonda kakuhle abo siphila nabo ehlabathini, ukwakha ubudlelwane obunentsingiselo, ukuphuhlisa uluntu, nokudala ubomi obufanele ukuphilwa.

Nazi iindlela ezintathu ezilula ngokungakholelekiyo olunokuthi ulwimi lukuncede ngazo ukuba utshintshe ubomi bakho:

1. Ukuthotyelwa kwekwePOPIA? Thetha oko kufuneka ukuthethile ngokulula nangolwimi olucacileyo.

Umyalezo oneziphumo ezifanelekileyo kufuneka ube ubunjwe kakuhle kwaye ubhalwe ngolwimi olucacileyo. Njengoko umdlali webhesi odumileyo wayekhe wathi: “Ukwenza oko kulula kube nzima kuqhelekile; ukwenza okunzima kube lula, kube lula ngokumangazayo, obo bubuchule.” UMthetho woKhuselo lweNkcukacha zoMntu (POPIA) uqale ukusebenza ngomhla wo-1 kweyeKhala 2021 eMzantsi Afrika, kwaye loo nto iye yakhokelela kuthotho lweentetho zezomthetho ezingaqondekiyo malunga nothotyelo lwe-POPIA njengezi zilandelayo:

“Ukususela ngomhla we 01 kweyeKhala, namhlanje, uMthetho woKhuselo lweNkcukacha zoMntu (POPIA) uyaqala ukusebenza.[…] Ngoko ke, uyaziswa ukuba unelungelo lokwala ukunikezela ngemvume elolo hlobo kwaye ungalisebenzisa elo lungelo ngokuthi ulishiye eli qela/, ungaphuma ngokuthi ucofe kwilinki esezantsi kule imeyili.”

Ukuba ungathanda ngokwenene ukuqhagamshelana nabantu, kuphephe ukusebenzisa isigama esintsokothileyo uthethe ngqo le nto uzama ukuyichaza. Ungathanda nokuba ubabulele abantu ngokuthatha inxaxheba. Ngolu hlobo:

“Nanjengoko kungenzeka sele usazi, ukwaziswa koMthetho woKhuselo lweNkcukacha zoMntu (POPIA) kuye kwaqalisa ukusebenza ngokupheleleyo ngomhla we01 kweyeKhala 2021 eMzantsi Afrika. […] Ukuba ungathanda ukuqhubekeka ufumana iileta zethu zeendaba, akukho mfuneko yokuba wenza kwanto kwaye uza kuqhubeka ufumana unxibelelwano olusuka kuthi. Ukuba ukhetha ukulifumani unxibelelwano olu loluhlobo ukuya phambili, uvumelekile ukuba ucofe kwiqhosha lokuphuma elisezantsi kule mbalelwano.

Uyabulelwa ngokuba ube yinxalenye yoluntu esilwakhayo.”

2. Sebenzisa u ‘si’ no ‘yethu’, hayi u‘ndi’ no‘wena’: Dala uqhagamshelwano, hayi ukuqelelanisa abantu.

Sinako sonke ukuba ngumqobo ngokwethu ezindleleni zethu, maxa wambi oko kube kungezonjongo zethu. Abongameli neeNgqonyela zolawulo eziphumeleleyo ziyayazi ukuba eyona ndlela yokusombulula iyantlukwano phakathi kwabantu kukubalisa ibali lobuntu elilula nelimalunga neenqobo esabelana ngazo singabantu. Ukusebenzisa u’si’ no’yethu’, hayi u’ndi’ no’wena’ kwenza uqhagamshelwano phakathi kwabantu, nanjengoko uMongameli uNelson Mandela wayesazi ngelixa wayesenza intetho yokufungiswa kwakhe njengomongameli eyibhekise ebantwini baseMzantsi Afrika neendwendwe zakhe zakumazwe ngamazwe ngomhla we10 kuCanzibe, 1994:

“Izenzo zethu zemihla ngemihla njengabemi boMzantsi Afrika kufuneka zivelise ubunyani boMzantsi Afrika obuza kuqinisa inkolelo yabantu kubulungisa, bomeleze ithemba labo ekubalulekeni komphefumlo womntu ze bugcine onke amathemba ethu obomi obuzukileyo kumntu wonke.

Konke oku sizityala kona thina buqu kwaye sikutyala naba bantu behlabathi ababamelwe kakuhle kangaka apha namhlanje.

Kuthi zintandazwe, andinazintandabuzo ekuthini umntu ngamnye kuthi uncamathele nca kumhlaba weli lizwe lihle kangaka njengoko kuncamathele kuwo imithi edumileyo yejakharanda yasePitoli nemithi yomnga kumathafakazi eli.”

UMandela wayenako ukuthethela u‘si’, abantu ababenokubonwa njengabaneqhagamshela kunye nomhlaba woMzantsi Afrika noluntu lwayo olungabemi, ngokungathaliseki kokwahluka-hlukana kwabo. Obu yayibubuchule benene, kwaye kuthethwa ngokulandelelana kwezinto ngokwendalo, umhlaba, into wonke ubani akwaziyo ukuqhagamshelana nayo.

3. Bulisa umntu ngolwimi lwakhe, hayi ngolwakho. Hlwayela indlela yokucinga engesakhono sokusebenzisa iilwimi ngeelwimi.

Ukubulisa umntu ngolwimi lwakhe kubonakalisa ukuba uyikhathalele ngokwaneleyo inkcubeko yakhe ukuba ude ufunde okuthile okuncinci ngayo, kwaye kukuvulela iingcango ezinokube bezivalekile kuwe.

Nkqu nokubulisa nje okungenani kuyayibonakalisa inkcubeko yethu nendlela esicinga ngayo. Akunjalo kwiinkcubeko zaseAfrika. Ukunqwala intloko okanye uncumele umntu odibene naye ekufoleni umgca okanye esitratweni, okanye u”Molo” nje ohamba yedwa ngaphandle kokuthi “Unjani?” kuye kubonakala kungebuntu eMzantsi Afrika. Oku kusithatha kusibuyisele umva kwiindlela zesintu ezityebileyo zokubulisa neziquka ukubuza malunga nentlalo-ntle yomntu neyosapho lwakhe (nkqu neyezinyanya zakhe), njengoku kubulisa ngesiZulu:

Sawubona. Ninjani? Oku xa kuguqulelwa esiXhoseni kuthetha ukuthi: Molo (ngokoguqulo ngqo: siya kubona. Unjani (ngokoguqulo ngqo: ninjani?)

Isakhono sokusebenzisa iilwimi ngeelwimi simalunga nokungaphezulu kokuzimisela ukufunda nokusebenzisa iilwimi eziliqela nje kuphela. Kukwayindlela yokucinga. Kusixhobisa ekubeni sibe namava ambaxa nahluka-hlukeneyo, kwaye sizibandakanye noluntu ngendlela echukumisa intliziyo, hayi nje ingqondo kuphela.

Njengoko nabani na owakhe waba kwiphulo lokufunda ulwimi olutsha esazi, loo mava okufunda angabuguqula ubomi bakho. Njengoko amava akho olwimi kwimeko yenkcubeko yalo esanda, uza kufumanisa ukuba ezi lwimi nezi nkcubeko awuzigcini kwiindawo ezahlukeneyo engqondweni yakho, koko wakha ubuchule bokusebenzisa iilwimi ezininzi obukhulayo nalapho lonke ulwazi lwakho namava akho athi abe negalelo, nalapho iilwimi zithi zibe nonxulumano.

Njengokunkcenkceza kwamanzi kwiqula lamanzi, ulwimi luneziphumo ezingalindelekanga nezimangalisa ngokwenene.

– nguKim Wallmach, uguqulo lolwimi lwenziwe ngu Siphumeze Mrwetyana noZama Bekweni

UGqr Kim Wallmach nguMlawuli weZiko leeLwimi kwiYunivesithi yaseStellenbosch. Ubulela oogxa bakhe kuMasebe esi-Afrikansi nesiDatshi, iZifundo zeKharityhulam, iiLwimi zale Mihla, nakwiZiko leeLwimi ngegalelo labo kwixabiso lesakhono sokusebenzisa iilwimi ngeelwimi.

[us_image image=”17583″ size=”medium” style=”shadow-1″]

iziphumo ezinenwenwayo (isibizo) isiphumo sesiganeko esinye esithi sibe nefuthe kwezinye iziganeko ngendlela engalindelekanga, okanye kwiindawo ezingalindelekanga.

Izifundo ezingembali yamagama: ngokufaniswa namaza anwenwayo ngaphezu kwamanzi xa kuthe kwajulwa ilitye kuwo
Umthombo: www.definitions.net/definition/ripple+effect

2 August 2021Tags: Indlela yokucinga engeelwimi eziliqela

Iminyaka engamashumi amabini yenkxaso kubabhali ukuze bavakale apho kufaneleke khona

Kulo Juni, iLebhu yokuFundisa ngendlela yokuBhala ekwiZiko leeLwimi eSU ibhiyozela iminyaka eyi 20 yasungulwa! iLebhu yokuBhala iyazingca ngobubele enabo, ukwamkela nendawo ekhuselekileyo apho abafundi nezifundiswa besoloko beziva bekhululekile ngokuxoxa ngemiba yokubhala kunye nenkxaso abayifumana kubasebenzi bethu abazinikeleyo ekucebiseni ngokubhala.

Into eyaqala njengephupha kuNjing Leon de Stadler (owayesakuba nguMlawuli weZiko leeLwimi), lafezekiseka xa iLebhu yokuFundisa indlela yokuBhala ivula iingcango zayo ngoJuni ka2001. Ngenxa yokuba savula ngeNyanga yoLutsha kwaye sisebenza nabafundi abaninzi abafuna ukuba ngabasebenzi abanekamva elihle, sibona kufanelekile ukuba sigqamise esi siganeko sibalulekileyo kwiNyanga yoLutsha.

KwiLebhu yokuBhala, sikholelwa ekubeni wonke umntu kumele ukuba aviwe kwaye abonwe. Kodwa xa ungakwazi ukuthetha ‘isiYunivesithi’ asoze ubenalizwi ekhampasini. Yile nto kanye esenza ukuba sisebenze nababhali ukuze siphuhlise amazwi abo ngokwezemfundo kwaye siphucule nesakhono sabo sokukwazi ukuba nengxoxo mpikiswano ngemiba abayivezayo. Indlela esiyisebenzisayo yokufunda ngokobulingane yasungulwa ngumMerika wombutho weentshukumo zenkqubela yenzululwazi ngokufundisa kwiminyaka yo 1970 kwaye yayisandisa ukungena kwabafundi kumaziko emfundo ephakamileyo nokuthabatha inxaxheba kwimisebenzi yemfundo.

ILebhu yokuBhala ihambe indlela ende ukusukela ekuqaleni kwayo, kwigumbi lokucebisa elalibolekwe eYunivesithi kwiSebe lobuNtlalontle, kwiminyaka eyi 20 eyadlulayo. USharifa Daniels noRose Richards babelisebenzisa kunye igumbi lokucebisa njenge ofisi yabo kwaye bene imeyile enye, ngelo xesha omnye wayelishiya igumbi ukuze kubekho indawo. INtloko yeFakhalthi, eyayine ofisi ekwiminyango emibini ukusuka kwiofisi yabo neyayingayazi ukuba kwakuqhubeka ntoni, yayisijonga ngesikrokro xa yayisibona sisihla sinyuka kulo paseji inde. Kwimigangatho emibini ephezulu, kwiSebe lesiAfrikansi nesiDatshi, uAnne- Mari Lackay wayesabelana ngedesika neqela labantu kwigumbi lokufundela lomntu wonke. Kwakungekho namnye kuthi owayenefoni, nto leyo eyayisenza ukuba rhoqo xa kufuneka sidibene, sihle sinyuka kulo manqwanqwa.

Ngelo xesha lika2001, sasineendibano zokucebisa nabafundi abayi 20, ngoku sidibana nabayi 3000 nangaphezulu. Nangona uSharifa wathatha umhlala phantsi ngo2018, uRose no Anne-Mari basasebenza kwiLebhu yokuBhala kwaye bajoyinwa nanguSelene Delport, uVinelene Hartley noCelestia February. Sixhaswa nangabafundi abasele benezidanga nabamalunga namashumi amathathu aneshihlanu abaqeqeshelwe ukuba ngabacebisi bokubhala. Uninzi lwabafundi beyunivesithi abasebatsha baye baqhube babengamakhankatha ezifundo nabacebisi bababhali abasakhasayo buqu.

Ngaphambi kokufika kuka2020- ongunyaka ubunzima kabhubhane weCovid 19- iindibano zethu zokucebisa uninzi lwazo besizenza ubuso ngobuso. Ukuqalisa kwalo bhubhane ukuhlasela saye sabona indlela ababengamakheswa ngayo abafundi nendlela ababekhathazeke ngayo ngomsebenzi wabo wezifundo, sawuthathela kuthi umceli mngeni wokuqalisa ukudibana ngobuxhaka xhaka bale mihla uMS Teams. Iqhuba kakuhle. Kwinyanga ka Apreli iyodwa nje safikelela kubafundi abangaphezulu ko 500 ngokusebenzisa ubuxhakaxhaka bale mihla. Iindibano zokufundisa ukubhala zabafundi abasele benezidanga, abamalunga nama 60 ngonyaka, nabo basebenzisa ubuxhaka xhaka bale mihla kwaye buyimfuneko enkulu.

Siziva siculumancile kwaye sinombulelo omkhulu ngeli thuba lokusebenza nabafundi. Aba ngababhali abanelizwi langomso kwaye ngesakhono esihle sokubhala bangavakala apho kufaneleke khona. Ukuba ufuna ukubhala kakuhle ngokwezifundo, wamkelekile ukuba ubhukishe indibano yokucebisa ngokubhala kunye nathi. Ukuba ngaba ikhona into engenye ongathanda sikuncede ngayo, nceda usithinte ngokusithumela imeyile!

– nguRose Richards noAnne-Mari Lackay; ulwimi luguqulwe nguZandile Kondowe

Qaphela: KwiZiko leeLwimi ,siyithobele imithetho emiselweyo yeCovid 19. Le mifanekiso yayithathwe phambi kokufika kobhubhane.

14 June 2021Tags: academic voice, academic writing, anniversary, writing consultations, Writing Lab, writing support

uSuku lwe Afrika ka2021: Isipho soqhagamshelwano

Inyanga kaCanzibe iqatshelwa njengenyanga yobu-Afrika. Olona suku lobuAfrika lubhiyozelwa ngomhla wama25 kuCanzibe ukukhumbula ukusekwa koMbutho woManyano lobuAfrika (Organisation of African Unity) ekungoku nje waziwa njengoMbutho wobuAfrika (African Union) ngomhla wama25 kuCanzibe ngo-1963. Ngolu suku, iinkokheli zamazwe angama30 kumazwe angama-32 ase-Afrika azimeleyo atyikitya umqulu e-Addis Ababa, eYutopiya, zenza isifungo sokukhuthaza ukwakhiwa kobuzwe ngendlela yomanyano nenkululeko kwingcinezelo.

Kule nyanga, iZiko leeLwimi likhethe ukugqamisa iindima ezibalulekileyo ezithe zadlalwa zitoliki kwilizwekazi i-Afrika ukukhawulelana neengxaki zokungavani ngokweelwimi, ukusuka kubasebenzi-ngeelwimi abaqeqeshiweyo neembongi zeentlanga ngeentlanga zoluntu lwaseAfrika ukuza kwiitoliki zale mihla ezichophela ukwakhiwa kobuzwe zize zibonelele ngofikelelo kwiinkonzo ngokutolika kwiipalamente zezizwe, iinkomfa, iinkundla zamatyala nezibhedlele. Kwaye, neetoliki zezemfundo ezenza kube nokwenzeka ukuba abahlohli abakwiiYunivesithi bavakale ngolwimi lwesiAfrikansi, lwesiNgesi, lwesiXhosa noLwimi lokuthetha ngeZandla loMzantsi Afrika.

Isenzo sokutolika intetho esuka kolunye ulwimi iye kolunye kwilizwekazi iAfrika, njengakuyo nayiphi na enye indawo, isusela kumawaka eminyaka eyadlulayo. Kuluntu oluninzi lwase-Afrika, abasebenzi-ngeelwimi abaqeqeshiweyo okanye iimbongi zazikuludwe olude lwezithethi ezinesipho sokuthetha iilwimi ezahlukahlukenyo nezazisenza imibongo kwimisitho yoluntu ebalulekileyo ukubhiyozela izenzo zoloyiso neempawu zobungangamsha kwinkosi nezinyanya zayo. Ubugcisa bomlomo bee-groits (‘iimbongi zesintu’) zaseNtshona Afrika neembongi (‘praise singers’) zaseMazantsi Afrika busaqhubekeka nanamhlanje, nalapho iimbongi zisebenza njengabasasazi kwezopolitiko.

Ukuviwa kwamatyala kwiKomishoni yeNyaniso noXolelaniso (Truth and Reconciliation Commission) ukususela ngo-1996 ukuya ku-1998 kwaba lithuba lokuqala lokuba abemi boMzantsi Afrika abaninzi baqhelane nemimangaliso yokutolikwa kwentetho ngaxesha-linye nokwenziwa kwayo ngeelwimi ezilishumi elinanye ezisemthethweni zoMzantsi Afrika. Iitoliki zazichophela uxolelaniso ngelixa lokuviwa kwamatyala kwiKomishoni yeNyaniso noXolelaniso. Ukususela ngoko, ziye zaqhubekeka ngokuncedisa ekwakhiweni koMzantsi Afrika njengesizwe kuwisomthetho lwesizwe nolwamaphondo, iintlanganiso zamabhunga oomasipala neenkomfa. Abanye abaqeshi abakhulu beetoliki eAfrika baquka uMbutho wobuAfrika (African Union), iPalamente yama-Afrika oMthonyama, i-UNON (iOfisi eseNairobi yeZizwe eziManyeneyo), i-SADC (uPhuhliso loLuntu lwaseMzantsi Afrika) neBhanka yoPhuhliso lweAfrika (African Development Bank).

Kwihlabathi lonke jikelele, iitoliki zolwimi lokuthetha ngezandla zaziwa ngobuchule bokufikelela ngemfundo kubafundi abanokhubazeko lokungeva, kodwa into engaziwa kangako kukuba iitoliki zeelwimi ezithethwa ngomlomo nazo zinakho ukwenza okufanayo ngokujoliswe kubafundi abevayo. IiYunivesithi eziliqela zoMzantsi Afrika zenza ukuba izifundo zaseyunivesithi zifikeleleke kubafundi abangaziva bekhululekile kulwimi ekufundiswa ngalo. ESU, iitoliki zethu zezemfundo zisebenza ngesiAfrikansi, isiNgesi, isiXhosa noLwimi lokuthetha ngeZandla loMzantsi Afrika.

Siyayibhiyozela indima edlalwe ziitoliki kwiminyaka edlulileyo ukunceda iAfrika nabantu bayo ukuba baqhagamshelane futhi baphumelele. SiliZiko leeLwimi sizithatha njengabanenyhweba njengoko siyinxalenye yelo bali.

Ukuba uyitoliki esebenza eAfrika, nceda wabelane ngebali lakho. Sithumele i-imeyili kule dilesi taalsentrum@sun.ac.za.

– ngoKim Wallmach; ulwimi luguqulwe nguSipumeze Mrwetyana noZama Bekeweni

Umthombo: Wallmach, K. 2015. Africa. In Pöchhacker, F. (ed.) Encyclopaedia of Interpreting Studies. London: Routledge.

24 May 2021Tags: Africa Day, African Union, imbongi, Interpreting in Africa, nation-building, political commentator, praise singer, simultaneous interpreting, Truth and Reconciliation Committee

Yonwabela inkululeko eziswa lulwimi

Yiba nomfanekiso ngqondweni ngehlabathi elingenalo ulwimi. Ingakwazi ukwenzeka lo nto xa ucinga? Awucingi ukuba ingenzeka lo nto?Awukhe uyicinge eyokuba ulwimi luthungelana neengcinga kwaye ayisebenzi eyokucinga ukuba ngaba awucingi ngolwimi lwakho? Uza kufikelela njani kwiingcinga zakho ukuba ngaba azizinzanga kuhlobo oluthile lolwimi?

Kwincwadi ethi , The language instinct, uSteven Pinker (1994:3) naye uyahambisana nezingcinga xa esithi: Language is so tightly woven into human experience that it is scarcely possible to imagine life without it. Chances are that if you find two or more people together anywhere on earth, they will soon be exchanging words” (Ulwimi lubhijeleke ngqo kumava omntu nto leyo inqabileyo ukuba bunganjani ubomi ngaphandle kolwimi. Maninzi amathuba apho unokufumana abantu ababini nangaphezulu naphina emhlabeni, ungabeva bencokola okanye besayinelana ngalo) Abantu abangakwaziyo ukuthetha nokuva basebenzisa ulwimi lwezandla njengabantu abevayo ngeendlebe abasebenzisa iilwimi ezithethwayo: ngokuhleka, ukukhala nokubhiyoza, kwaye iziphumo zezichukumisayo nezakhayo.

Yile ngcamango kanye esingenakho ukuba singangabelani ngayo ngolwimi lwethu nabanye abantu kwaye indenze ndicinge ngale nkululeko intle esiyiphathelwa lulwimi ukuze sikwazi ukuyisebenzisa. Ulwimi lukhulula iingcinga ezikwintloko zethu ngokusinika isixhobo sokulusebenzisa,kwaye maxa wambi sothule umthwalo osemagxeni omnye umntu. Ulwimi lunika indlela yemvakalelo, ukuviwa kwaye ukwazi ukunxulumana nabanye. Iilwimi ezahlukeneyo zilawulwa yimigaqo eyahlukeneyo yokubhalwa kwegrama, kodwa eyona Nkululeko ivulekileyo yile yokukwazi ukusebenzisa ulwimi kwaye uvelise into abanye abantu abangazange bayithetha ncakasana ngendlela ebalaseleyo. Cinga ngemibongo,iziqwengana zocamngco, iblogu,amavo okanye iincwadi ezinezihloko ezinye zababhali abahluka hlukeneyo.: umzila omhle abanokuhamba ngawo, kodwa kukho indlela ezininzi ezahlukeneyo zokuvakalisa imvakalelo. Le nto ayikwenzi ucinge ngokufuna ukuqala ukubhala into ngokukhawuleza?

Siphila kwixesha apho inkululeko yethu yentshukumo nenkululeko yendibano ziphantsi komngeni womngcipheko wolosuleleko. Nakubeni ezinye zenkululeko zethu zokudibana ziphantsi koku ncitshiswa ukuze kunqandwe ukunwena kobhubhane esijongene naye, inkululeko yethu yobungqondi ayiminywanga yona. Masamkele le meko sikuyo ingaqhelekanga ukuze sikhumbule izinto ezininzi esaziphathelwa yinkululeko.

Ukukhumbula usuku lweNkululeko kulo unyaka, thina kwiZiko leeLwimi sikhetha ukubhiyozela inkululeko esinayo kulwimi – amathuba angenasiphelo esiwaphathelwa lulwimi ukuze sivakalise imvakalelo zethu, sinxulumane nabanye abantu kwaye siphile ubomi bethu, nokuba ngaba amathuba ethu okubonana emancinci okwethutyana.

– nguSusan Lotz noKim Wallmach; translated by Zandile Kondowe

Full reference: Pinker, Steven. 1994. The language instinct: The new science of language and mind. Penguin Books: London. 3

22 April 2021Tags: Indlela yokucinga engeelwimi eziliqela

Masikhuthaze ukuxatyiswa kweelwimi ezahlukileyo

Minyaka le, ngomhla wama-21 kweyoMdumba, ihlabathi lonke ngokubanzi libhiyozela uSuku loLwimi lweeNkobe kwiHlabathi ngokubanzi. Le mibhiyozo yasungulwa kwinyanga yoMdumba kumnyaka ka-2000. Ukusukela kuloo nyaka ke, amazwe ngamazwe ehlabathi, ingakumbi abathandi bolwimi, babhiyozela iilwimi zeenkobe ngendlela ngeendlela ezahlukileyo. Ezona njongo zokubhiyozelwa kolu suku, kukuphuhlisa ukwahluka kwethu ngokwenkcubeko, kuquka nokukhuthazwa kokusetyenziswa kweelwimi ezahlukileyo. Esona sizathu sokuzibandakanya kwiphulo lokukhuthazwa kokusetyenziswa kolwimi lweenkobe, kukuba iilwimi ezininzi kwihlabathi liphela, ziya ziba semngciphekweni wokubhanga. Ngokophando olwenziwe nguMbutho weeLwimi waseOstraliya, kufumaniseka ukuba zingama-43% kumyinge ekhulwini iilwimi ezisemngciphekweni ehlabathini. Iilwimi ziba semngciphekweni xa abantu bengazisebenzisi ekuzithetheni, ekuzibhaleni, kwezemfundo nakumaqonga obugcisa afana nomabonakude, i-intanethi, kwiminxeba, kuquka nakwimijelo yeendaba.

Ukukhuthazwa kokusetyenziswa kweelwimi zeenkobe, akuyi kuphelela nje ekongeni nasekuphuhliseni oko kulilifa ebantwini, koko kukhuthaza nokuzibandakanya kwinkcubeko yabo bathetha olo lwimi, ukuba yinxalenye yokusetyenziswa kweelwimi ezininzi, kuquka nokubambisana kuphuhliso lwezinye iilwimi nokuxhasa amaphulo okusetyenziswa kwazo zonke iilwimi ekubeni kufundiswe kwaye kuphandwe ngazo.

Thina kweli ziko sikholelwa kwelokuba ulwimi aluphelelanga nje ekubeni lulwimi –koko ikwangumjelo wokugqithisela amasiko. Ulwazi nothando olungagungqiyo lolwimi namasiko, luzinze kumbilini nakumathambo abo bonke abasebenzi beli ziko lolwimi. Okona sikholelwa kuko kukuba ulwazi nothando lweelwimi ezahlukeneyo, kunegalelo ekuzinziseni ubudlelane phakathi kwabantu, phakathi kwemibutho, phakathi kwezizwe kummandla othile wenkcubeko. Xa sikhuthaza ukuxatyiswa nokukhuliswa kolwimi ngobugcisa kwiZiko leeLwimi, sikhuthaza abafundi bethu nabaxhasi bazinikele kangangoko ekufundeni ezinye iilwimi kunye nathi – ingasisiXhosa, isiAfrikansi okanye isiNgesi.

Simema bonke abaxumi (different stakeholders) beYunivesithi yaseStellenbosch nabahlali bedolophu ngokubanzi, ukuba baze kuzibandakanya nomsebenzi omhle weli ziko leelwimi ukuze sakhe isixeko esingaphelelanga nje ekuthobelelaneni ngokweelwimi, koko ibe sisixeko esifunda iilwimi ngeelwimi, ukuze sakhe isizwe esiyimbumba nesasikhuthazwa bubunkokheli bukaNelson Mandela.

Ngokubhalwa nguZandile Kondowe

International Mother Language Day poster

19 February 2021Tags: Indlela yokucinga engeelwimi eziliqela

Udonga lwesikhumbuzo sikaPumlani

It is with the utmost shock and sadness that we heard the news on Sunday 6 December that Pumlani Sibula had passed away. He had been recovering from Covid-19 at home.

Pumlani was a valued colleague at the Stellenbosch University Language Centre for many years. He joined the Language Centre in 2003 as the head of the Unit for isiXhosa, where he was tasked with developing isiXhosa terminology for various departments at the University, as well as teaching isiXhosa language and culture to staff and international students.

Pumlani was well known for his passion for isiXhosa language and culture, and for his inspirational teaching. His most notable teaching achievements include teaching isiXhosa Language and Culture for Global Leadership Adventures (GLA) (a winter school programme for high school students all over the world) from 2007 onwards, as well as teaching isiXhosa Language and Culture at Northwestern University in Chicago, USA, in 2009. He received the Rector’s Award in 2009 and 2011. He left SU for a brief period, and rejoined the isiXhosa portfolio in October 2019.

Pumlani’s legacy lives on also in the subject-specific terminologies he developed for isiXhosa in Sociology, Social Work, Psychology, Law, Economic and Management Sciences, Theology and Engineering. He was also responsible for developing the terminology lists for Soccer, Cricket and Rugby.

On behalf of all of the staff at the Language Centre, I would like to express my sincere condolences to his colleagues, family and friends, and ask that we treasure our memories of Pumlani’s sense of humour, his humility, his love for good food and his passion for language.

We received so many messages and memories from Pumlani’s colleagues that we decided to honour him by creating a wall of remembrance for him on our website. Please take your time to read through the contributions below and remember him.

An online memorial service organised by Pumlani’s friends will be held on Friday 11 December from 15:00 to 18:00. Please contact Grant Ngidi (gngidi@sun.ac.za) for more details. The Language Centre will also organise an online memorial service for Pumlani in January, to which SU colleagues and external collaborators will be invited. Please contact Cheryl at taalsentrum@sun.ac.za if you would like to attend.

May we all find comfort in knowing that he is now at peace. Hamba kakuhle, Pumlani.

– Dr Kim Wallmach, Director, Language Centre

Elokumbonga uPumlani

Umyili, umkhathaleli nomlondolozi wamagama
Amabinzana, iintethwana, amabalana, nobulumkwana obungcanyulwayo kungoku nje
Uthando nokuzingca, intembeko nenyaniso
Iihomba nenene, indlezana, wena uxabisekileyo
Udumzelo nongqisho, unambitheko nesingqi
Iingoma zakho, ilizwi lakho, kanti nokusoloko ukho
Iihambo zethu, ukudibana kwethu namagope esingawabonga
Gxa wethu othandekayo, qabane, mnakwethu, mhlobo
– Erica George, obesebenza naye kwiZiko leeLwimi

Amagqabantshintshi ngoPumlani

UPumlani ndiza kumkhumbula njengogxa wam, ngezizathwana nje ezimbalwa.

Sonke thina bazama ukuphucula isakhono sethu sesiXhosa ngokungenela isifundo esilungiselelwe isitafu, siyakukhumbula loo nzondelelo kaPumlani, emi phaya phambi kwebhodi emhlophe. Nje umntu wakumbuza umbuzo, uqalisa ukubhala ebhodini ngayo yonke imibala ngokulandelelana kwayo, egcwalisa zonke izithuba ezingenanto. Yayiba luvuyo ke kubafundi bolwimi ngoba uninzi lwethu phambili phaya lwalukhe lwafundiswa ngabo abantetho ingeyiyo eyeenkobe.

Ngalo lonke ixesha xa ndifuna ukuqinisekisa ukuba umbuliso, inthetho okanye umthandazo wam wesiXhosa uchanekile, bendikwazi ukutsalela uPumlani umnxeba. Ebezivuyela kakhulu iinzame zethu ezingephi zokufunda ulwimi lwakhe. Ebebebonakalisa ithemba kananjalo esikhuthaza xa sizama amaganyana ambalwa athethwayo. Iinkcazelo zakhe ngeNcubeko yesiXhosa bezizezokwenene zinobulumko ngokunjalo.

UBra Pumlani uyakukhunjulwa kakhulu.

Hamba kakuhle, Pumlani.

– Ydalene Coetsee, owayesebenza naye kwiZiko leeLwimi

Umhlobo nomxhasi

Kube ngumothuko nobuhlungu obukhulu ukuva ngokusishiya kukaPumlani./p>

UPumlani ebengumhlobo nomxhasi, ngakumbi kwiLebhu yokuBhala (Writing Lab) – sineminyaka emininzi simazi. Eneneni ebephila ubomi obunobuntu – ebakhathalele abanye abantu – engumntu onyanisekileyo, othembakeleyo, ozithobileyo nonobubele, enentliziyo entle ngokunjalo.

Yhini, Pumlani – ubuseze ngobuso elizweni kwaye besisajonge lukhulu kuwe – usibonisa kananjalo usifundisa umoya wobuntu nendlela emasikhathalelane ngayo.

Akwaba umzekelo wakho ubuya kuhlala uhleli ezintliziyweni zethu, wona umphefumlo wakho uphumle ngoxolo.

– Anne-Mari Lackay, owayesebenza naye kwiZiko leeLwimi

Ebeya kuba namagama afanelekileyo

UPumlani ebengumhlobo nomnakwethu iminyaka engaphezu kweli-17. Wayengomnye wabantu abanobubele kambe engoyena mntu onentlonipho endakha ndadibana nayo. Wayendimela xa kungekho namnye owenza njalo. Ebendithuthuzela xa ndinoloyiko. Ebede afune ukundinceda naxa ndinengxaki zemali. Zininizi izinto ebesifana ngazo, kuquka iingxaki zamakhaya nokuziva sibekelwa bucala. Sobabini sikhe sakuva “ukuba ngamanxele alungiswayo”.Sakhula ke kulo nto. Akazange andigwebe.

Kwaye sasingafani tu. Wayethanda uTina Turner noShirley Bassy, ngelixa mna ndandithe phithi nguBilly Idol nomculo wohlobo lwe-Southern gothic. Wayethanda iisowupi zaseMzantsi Afrika, ngelixa mna bendikhetha iHBO. Kodwa sobabini besimthanda uMerlin (Isirisi) noGame of Thrones. Kwaye besiyithanda inyama.

Kwiminyaka emininzi ngelixa apho ii-ofisi zethu zazisamelene, sasibanedinga lokuya kwisidlo sasemini emva kosuku lokwamkela. Ibisithi nje yankungena imivuzo yethu siye eBlue Room (igumbi elalisakuba lelokutyela istafu) sithenge eyona plata yenyama inkulu esasinokuyifumana. Iintlobo ezintathu zenyama, kwaye sasiya kuzitya sizigqibe.

Kwathi emveni kokuba sifudukele kwezinye ii-ofisi nasemva kokuvalwa kweBlue Room, saya kudibanela kwaMugg and Bean sidibanela ikofu/iti okanye ilantshi. Sakha sadibanela naseCanal Walk apho wanyanzelisa ukundinika i-milkshake yebhotolo yamandongomane nangelinye ixesha eTyger Valley, apho ndazama ukumthengela ilantshi, kodwa wathatha nje isaladi encinci.

Wandazisa iti yephephamenti njengento yokuncedisa ukucola ukutya. Imnandi nyani. Ndisayisebenzisa nanamhla oku. Sasincokola ngeendlela zokuzilolonga nobunzima bokubambelela kuzo. Sakha sahlazisa oogxa bethu abaninzi kwikona yesitalato kude kufuphi ne-Oude Werf ngokuthi sizenze umatshini wakhe omtsha onepleyiti engcangcazelayo.

Omnye nomnye kuthi ebelithembe lomnye xa kukho iingxaki ezingolwimi, uguqulo-lwimi, isigama, neenkcazelo. UPumlani ebeluthanda ulwimi. Wakha waluchaza ngelithi ligazi lakhe. Wayeziva elulwimi. Kwakuyinto ayithanda kakhulu, kwaye apha kum wabona uthando lokwenza uphando. Wayesoloko eyazi eyona nto ifanelekileyo emayithethwe. Ukuba olu ibilufundo ngobomi bam, ebeyakuwazi awano mazwi afanelekileyo. Ndingamnika la magama kuphela ngenjongo yokushwankathela phantse iminyaka engamashumi ama-20 singabahlobo, minyaka leyo engenakuze ithathelwe indawo yeminye iminyaka.

– Gqr Rose Richards, owayesbenza naye kwiZiko leeLwimi

“Ndizithandela nje umbala”

Ndonakele kukuva ngokuhamba kukaPumlani.

Eyona nkumbulo ndinayo ngoPumlani kumhla ndankqonkqoza kwicango le-ofisi awayesabelana ngayo noZandile kumgangatho osezantsi eNombolo 7 kwiSitalato iBosman ndisamkelwa shushu ngelithi “Molo, Sisi”. Njengoko wayephakamisa amehlo ewasusa ekufundeni iBhayibhile yakhe.

Yandonwabisa eyokuba ndimbone enxibe ijezi yombhoxo yeBlue Bulls, njengoko ndakhulela kambe ndandiphila kufutshane nePitoli ubukhulu becala ebomini bam. Ndaphawula ndisithi indimangalisile kambe indivuyisile eyokuba kanti ungumxhasi weBlue Bulls. Wandijonga enga angabuza umbuzo wathi, “Hayi, andinguye umxhasi, ndithande nje umbala!”

Wanga umphefumlo wakhe ungalala ngoxolo.

– Shannon Bishop, owayesebenza naye kwiZiko leeLwimi

Iduma elingophiyo kumasebe eelwimi zaseAfrika

Ndagqibela ukuncokola noPumlani xa wayevuyele imbasa yakhe ndaza ndavuyisana naye ngaloo Mpumelelo ingenambaliso. Wayevuya kakhulu. Kanti ndandingayazanga ukuba leyo yayiyincoko yethu yokugqibela. Ndonakele kwaye andikwazi kucinga kakuhle kungoku nje. Mhlobo kabani yena onobubele, inkuthalo nobushushu kangaka. Umphandi nomfundisi ntsapho ophum’ izandla.

Kufandini kambe ulutshaba! Luphi na ulwamvila lwakho.

IZiko lakho LeeLwimi liyalambatha ngaphandle kwakho.

Thina, singamasebe eelwimi zaseAfrika sisonke siyalambatha ngaphandle kwakho Mnu Pumlani “PM” Sibula – mhlobo wam othandekayo nomninawa ngokunjalo.

Wanga umphefumlo wakho, MGEBE omhle, ungaphumla ngoxolo uvuke unobuqaqawuli.

Uyakusoloko ukhona entliziyweni yam.

Ndiyabulela kakhulu ngokusebenza kwakho kakhulu kangakanana ekuphuhliseni iiLwimi zaseAfrika.

– UNjing Nomsa Satyo, iNtloko yeSebe leeLwimi zaseAfrika, kwiYunivesithi yaseFort Hare

“Ndidumile kodwa andazi ukuba yenzeke njani loo nto”

Kuye kwafuneka ndiye kuvumbulula iifayile zamhlamnene kwikhompyuta yam ukuze ndibone ukuba uPumlani lo waqala nini ukuzidibanisa neli Ziko leeLwimi, kwaye xa ndicinga kungenzeka ukuba kwakuphaya ekuqaleni kuka-2004 okanye ngo-2003 mhlawumbi. Ndandisebenza naye kakhulu ngaloo minyaka yangelo xesha kuba ndandisebenza phantsi kwakhe ekuqulunqweni kwezintlu zesigama zokuqala zeSingesi-IsiXhosa-iAfrikaans. Sabanombhiyozo omkhulu wokuvula emva kokugqitywa kwezintlu zesigama zokuqala ngoNovemba 2004. Ndisakhumbula ukuba uPumlani wayekhwankqisiwe yinkathalo awayifumanayo waza waphawula ngelithi: “Ndidumile, kwaye andazi ukuba yenzeke njani loo nto.”

Ukususela mhla wazidibanisa nathi e-7 Bosman Street kutshanje, uye waba yinxalenye yeqela lethu apho, kwaye waye soloko ezidibanisa nathi kwiingxoxo zethu zasetafileni. Bekusoloko kuluncedo kum ukuphulaphula izimvo zakhe njengomnye wabemi boMzantsi Afrika, ethetha njengophuma kwinkcubeko engafaniyo neyam. Siya kumkhumbula.

– Erina Basson, owayesebenza naye kwiZiko leeLwimi

Ifuthe elakhayo nelithabathekisa ngendlela engaqhelekanga

Emva konyaka ongafaniyo neminye, ohlisa isidima sobuntu, intliziyo yam iye yaqaqamba namhlanje ndakuva ngokuhamba kukaBra Pum – yinto ebingalindelekanga kwaphela nedal’ umothuko omkhulu. Ngoko ke ndinga ndingadlulisa amazwi ovelwano olunzulu kuye wonke ubani kwiCandelo leeLwimi. Ngokucacileyo ke phofu, ndinovelwano olungazenzisiyo nosapho nezihlobo zikaPumlani.

Ubudlelwane bam noBra Pum eneneni ibi bobubodwa, ngakumbi ngokubhekiselele kwizimvo zethu sobabini malunga nokubaluleka kobulwimininzi nto leyo isafuna siyinike ingqwalasela yethu nangaphezu kunokuba besiyinika. UPumlani ebenentliziyo emhlophe kwaye ifuthe lakhe kum lindakhe ngendlela engaqhelekanga nethabathekisayo. Andisokuze ndiwalibale loo maxesha esasixoxa shushu ngawo kwiintlanganiso zethu zeveki, sicwangcisa ukuphucula imeko yesiXhosa, hayi ekhampasini kuphela, koko naseluntwini ngokubanzi apho kwakuye kufuneke sisebenze khona. Ndibe nethamsanqa lokuba yinxalenye yovuyo lwakho olungathi lolomntwana malunga nommiselo ngamnye othe waphunyezwa (iikhosi ezimfutshane, izigama, ndibala ntoni na?) Kodwa ebesonwaba kakhulu xa efundisa ulwimi lwakhe awayeluthanda kakhulu, isiXhosa…

UPumlani ebengomnye wabaphathi abathuleyo, kodwa akuliphakamisa ilizwi lakhe bekufuneka uphulaphule, uzigqog’ iindlebe ukuze uyive yonke loo miyalezo ithande ukufihlakala awayefuna ukuyidlulisa.

UBra Pum ebenguntozonke kwiziko lethu kwaye ebenetalente ezifihlakeleyo neendima isitafu esininzi ebezingazazi: ebeyimbongi (i-poet ngabula makhumsha), imbongi eyaziwayo, intaka ukucula oku, kambe kungaphelelanga apho, ebeliqhula elingavelanga elalinokunyumbaza nditsho nocikicane wam. Ekuthanda ke ukutya. Andisokuze ndilulibale usuku mhla sasisenza amalungiselelo womnye wemicimbi yeZiko leeLwimi, xa wayegxininisa kwelokuba ukutya makunganqongophali esitsho esithi “genoeg vleis, asseblief”. Ndisakhumbula ndimva esithi “Oh, Gaaawwwd” (indlela awayelibiza ngayo eli gama kwakukunomahluko!) xa into ingenzekanga kakuhle.

Ndongeza iifoto ezimbini zamaxesha olonwabo endakha ndabanawo nalo mfo ungafaniyo nabanye, elokuqala lelo lamhla kwakukho umcimbi wesitafu ngo-2006 ze owesibini ibe ngulowo wamhla isitafu sandothusayo ngokuthi galakanqa ngomhla wam wokuzalwa ngo-2007.

Andisokuze ndilibale …

– UNjing Leon de Stadler, owayesakuba nguMlawuli weZiko leeLwimi

Imiyalezo emifutshane yovelwano

Uvelwano lwam olunzulu ngokushiywa kwethu nguPumlani. Akwaba beniya kuthuthuzelwa kuyazi ukuba useluxolweni. Ndicinga ngani nabo bonke oogxa bam kwi-LC.
– Audrey Poole, owayesa kusebenza kwiZiko leeLwimi
***

Thina sikwiCentre for Health Professions Education (CHPE) sinqwenela ukudlulisa amazwi ethu ovelwano angazenzisiyo kuni kwiZiko leeLwimi. Sibuhlungu kukusweleka kogxa wenu nomhlobo wenu uPumlani. Ebesebenzisana kakhulu naye nabalungiseleli beelwimi kwiziko lethu kwaye siyakumkhumbula ngokwenene.

Nonke sininqwenelela okuhle ngeli xesha linzima.
– Gqr Elize Archer egameni leCHPE, iFakhalthi yamaYeza neeNzululwazi zeMpilo
***

Sivile kambe sikhathazeke kakhulu kukusweleka kukaPumlani Sibula. Siyi-Global Education Centre (GEC), sinqwenela nje ukudlulisa umyalezo wethu wovelwano kananjalo sidlulise nomyalezo wenkxaso.

UPumlani udlale indima ebaluleke kakhulu ekwamkeleni nasekufundiseni abafundi bethu abavela kwamanye amazwe. Uya kukhunjulwa kakhulu ekhunjulelwa umsebenzi wakhe.

Nceda usazise ukuba singaba luncedo ngayiphi na indlela kweli xesha linzima kangaka.
– Sarah Jane van der Westhuizen, Global Education Centre
***

Ndithumela amazwi am ovelwano ngokuhamba kukaPumlani. Hayi ukubamkhulu komothuko sakuva oku. Yanga singasoloko sikhumbula ukuba ebekuthanda kangakanani ufundisa abafundi.
– Nkszn Kristin Rutgers, Human Resources
***

Enyanisweni ezi, ziindaba ezibuhlungu nezothusayo ngokunjalo. Ndiya kulukhumbula olo ncumo lwakhe olunobubele kananjalo nokusoloko ebona okuhle ebomini. Ngumntu obekumnandi ukuba naye kwaye ndisoloko ndiyikhumbula i-”after party” esasasinayo emva komcimbi wokuvala unyaka xa ndammemayo ukuba azekuchitha ubusuku kwam nalapho sonwabela ukuncokola kwade kwasebusuku saza sonwabela isidlo sakusasa kwangoko phambi kokuya emsebenzini. Ndazimasa iikhosi zakhe zesiXhosa ezimbini nawayeziqhuba ngobugcisa kambe nangendlela eyonwabisayo.

Phumla ngoxolo Pumlani, uza kukhumbuleka!
– Lize Kruger, Language Centre colleague

Inkumbulo yakutshanje

Ndiye ndaya kumkhangela uPumlani ngeli lixa lokumiswa ngxi kweentshukumo kuba ndiqondile ukuba kungakubi kakhulu ukuchitha ixesha elingaka uwedwa. Wayenochulumanco engumntu osoloko enethemba.

Lo ngumyalezo ebendisandula kuwuthumela kuPumlani kunye nefoto eqhotyoshelwe kuwo.

Molo mhlobo wam! Usakhumbula ukuba kwakukho ixesha apho sasikwazi ukuwolana ngaphandle kokoyika ulosuleleko? Unjani ngempilo?

– Gqr Anita Jonker, awyesebenza naye kwi-Faculty of Arts and Social Sciences

Video: 30 seconds of Pumlani teaching isiXhosa

Intetho yomngcwabo elungiselelwe isihlobo sethu nogxa wethu othandekayo. Pumlani “Sihlobo sam” Sibula

Ingcali kwezeelwimi kwiziko, ugxawethu ozinikeleyo nomhlobo onyanisekileyo, endabanethuba elilodwa lukuba kufutshane naye, kwiminyaka esibhozo edlulileyo, kwinqanaba lamasebe ngamasebe kwaye mvanje, kwiZiko leeLwimi.

UPumlani ebeligcisa loluntu elinemfesane, uvelwano nokuzithoba, elikhathalele okona kubalulekileyo ebomini, abantu ebesebenza nabo kunye nabo bakhonza bengananzanga iziqu zabo kuphela. Indoda ezinikeleyo, enengqondo, echubekileyo neyona ndoda inobubele obukhulu, eyayibiza wonke umntu ngelithi “Sihlobo sam – my friend!”

Kukho elabadala elithi: “Ukunxiba kakuhle luphawu lokuziphatha kakuhle”. Eli nene, eneneni lalinxiba kakuhle, eziphethe kakuhle yonke imihla, ngendlela yalo yokunxiba , noncumo lwakhe oluyolisayo, kwindawo asebenza kuyo kanti naphi na apho akhoyo.

Ebengafihli makhuba kulanjwa. Yindoda ebiphila ubomi apho akwenzayo kubaluleke ngokufanayo nesiphumo salo nto. Umzekelo ebenguwo ebekwenza ukuba ubengugxa wakhe ongcono, udadewabo ongcono, umhlobo wakhe ongcono kambe ubengcono nasemsebenzini.

Ushiya umzila womsebenzi obunempumelelo apho ebesebenza khona ngobulumko kwiSikolo samaBanga aPhezulu iMakupula nakwiYunivesithi yaseStellenbosch, encedisa abafundi ekubeni babenezakhono zolwimi ezifanelekileyo. Wayesebenza kwiZiko leeLwimi, equlunqa isigama kunye neeglosari ezilwimininzi, ukucedisa abahlohli nabafundi ekubeni babe nokukuqonda nangakumbi okuqulethwe ezifundweni. Ubenegalelo nasekuthiyeni amagama esiXhosa izakhiwo ezininzi, amasebe neeFakhalthi zakwiYunivesithi yaseStellenbosch, magama lawo ahamba nawesiNgesi nesi-Afrikansi.

Wayengumqulunqi novulindlela kuncwadi lwesiXhosa kuzo zonke iilwimi ezahlukahlukeneyo zaseNtshona Koloni. Uthungelwano lwakhe loqulunqo kwezolwimi lwalunabe ukusuka kwiiFakhalthi ngeefakhalthi kwiYunivesithi yethu, kwiiklabhu zoluntu ezingolwimi kwelase Stellenbosch, ukuya kwiYunivesithi zamazwe ngamazwe, iPansalb, iSebe leMfundo eNtshona Koloni, iiNkonzo zeSizwe zoLwimi, i-Project for the Study of Alternative Education in South Africa (PRAESA), ne-Writers Guild… ndibala ntoni na. Nje kunyakomnye kuphela ndisebenza naye kwiZiko leeLwimi, uPumlani wandifundisa ngokwakhe indlela yokunceda abafundi abaphuma kwabo balwimi ingesiso isiNgesi ukuze bakuqonde nangakumbi nakuphi na okuqulethwe zizifundo, ngokuqulunqa iiglosari eziphambili zeekhosi okanye isigama sokunceda abafundi, ngeli lixa esabelana ngokunjalo ngobungcali bakhe obungazanga balanywa ngaphambili kwikhosi yethu yesiXhosa esiyifundisa abafundi abalwimi labo lwenkobe lungesiso isiXhosa kwiYunivesithi iphela.

Ndikhumbula wonke ubani obesiza kwiofisi yakhe – ababesakuba ngabafundi bakhe nabaphathi bamasebe – bemncoma ngokuba nefuthe kwakhe nobubele bakhe obungenambaliso. Apha ngezantsi kukho abanemiyalezo emtyibelayo nendizichazelwe ngabo bamaziyo:

UGqr Vuyo Mntuyedwa: “Ndikule ndawo ndikuyo nje ngubhuti Pumlani. Ndifundisa eYunivesithi namhlanje, kwaye kungenxa yokuqeqeshwa nguye.”

UGqr Xolani Mavela: “Umzi wesiXhosa ngokubanzi ulahlekelwe. UPumlani sisithwalandwe, isikhuthali, ithandazwe, ithandamntu novulindlela kuphuhliso lwesiXhosa jikelele.”

Nksz Nosisa Beyile (uMcebisi ngeKharityhulam): “Andikholelwa ukuba uMhegebe usishiyile. Kazi sakuncedwa ngubani na ekuhleleni iinkqubo zoncwadi lwesiXhosa siyiWCED?”

Abafundi baseKayamandi: “Ukuba sasingalifumenanga ithuba lokufundiswa ngutitshala uSibula, ngesingekho kwezi ndawo sikuzo namhlanje.”

Ekugqibeleni olu asilulo na uphawu lwendoda yamadoda: indlela aphila ngayo, indlela aphatha ngayo abanye, kungakhathalisekile nokuba ujongene neentshaba ezinjani ebomini bakhe? UPumlani ebeyindoda ebalulekileyo kwaye undikhumbuza uAnastasia Netri xa le nto indoda eyichaza ngelithi: “Indoda eyiyo iyakusoloko ifuna ukuba ubalasele. Ifuna ukuba ubengokhwankqisayo.” Simkhumbula ngaloo ndlela ke u-”Sihlobo sam”, kuba ngenzondelelo yakhe, uncumo lwakhe nenkxaso yakhe engakhethiyo, wayefuna ukuba wonke ubani abesemagqabini.

Wanga umphefumlo wakho ungaphumla ngoxolo “Sihlobo sam”, uvuke ebuqaqawulini. Hamba kakuhle ulale ngoxolo Mpondo, Mgebe, Mngxongo!

Umhlobo wakho nodade wenu

– Gqr Zandile Kondowe, ugxa wakhe kwiZiko lweeLwimi

8 December 2020

Ukunikwa kwewonga lembasa kumseki welebhu yokubhala othathe umhlalaphantsi

USharifa Daniels, omnye weqela labasebenzi ongumseki kwiLebhu yokuBhala yeZiko leeLwimi, wathatha umhlalaphantsi ngo-2018, emva kweminyaka ephantse ibe li-17 yokubonelela ngeenkonzo kubabhali basekhampasi. Sathatha isigqibo sokuba simwonge ngoshicilelo olukhethekileyo lweziQinisekiso zaMaphepha emfundo kwezeeLwimi eStellenbosch (Stellenbosch Papers in Linguistics Plus (SPiL Plus), iphepha-ndaba eliqinisekisiweyo elifikeleleka kuwonke-wonke. Sithathe isigqibo sokuba silubize olu shicilelo ngale tayitile ‘ISithuba, indawo, namagunya kumaziko okubhala aseMzantsi Afrika’, njengoko isithuba, indawo namagunya iziinkxalabo ezisondele kakhulu kwintliziyo kaSharifa, nanjengoko sinika ingcaciso kwintshayelelo yethu malunga nalo mba.

USharifa wayesoloko exoxa nathi ngale miba xa sasicinga ngokubaluleka kwendima edlalwa yiLebhu yokuBhala kwikhampasini. Ephuma kwimvelaphi eyayiyinxalenye yomzabalazo owawuchasene nocalucalulo, uSharifa wakubona ukuba yenye into ukwamkela abafundi ‘abangengabo abesithethe’, kodwa ibe ngomnye umba ukubanceda aba bafundi ukuba bazive beyinxalenye yasekhampasini. Ngaphambi kokusebenza kwiLebhu yokuBhala, uSharifa usebenze ixesha elide kwimfundo yasesinaleni kwizikolo ezingathathi ntweni. Apha nakwezinye iindawo, wazibonela ngokwakhe ubungqina bokwakusenzeka ezimpilweni zabantu nakwimfundo yabo phantsi kocalucalulo. Wafumana nenkxaso-mali yokufunda kwiYunivesithi yase-Iowa nalapho waye waba nomdla kumaziko okubhala nzobulungisa bentlalo yoluntu obunokuziswa ngala maziko. Le yimibono awathi weza nayo ekhaya waze ethubeni wakwazi ukuyisebenzisa eStellenbosch.

Olu shicilelo lukhethekileyo lushicilelo lokuqala ehlabathini olumalunga namaziko okubhala aseMzantsi Afrika. Imixholo yesithuba, indawo namagunya inexesha elide ibalulekile kumsebenzi wamaziko okubhala kwihlabathi, kodwa inokubaluleka okukodwa eMzantsi Afrika nalapho upolitiko lwethu lwexesha lamandulo nelangoku lusebenza ngendlela yokuba isithuba nendawo zibuvumela njani ubudlelwane obusekelwe emagunyeni buqhubeke. Amaziko okubhala akhona ukulungselala ukunika uncedo ababhali abangabafundi ukuba baphuhlise ubuchongwa kwabo ekubhaleni kwezemfundo ephakamileyo, kodwa bakwenza oku ngaphakathi kwezakheko zeziko ezichaphazela ukuba basebenza njani kwaye kutheni besebenza.

Olu shicilelo lukhethekileyo lunamanqaku ali-12 kwaye umele amaziko okubhala asixhenxe aseMzantsi Afrika. Ukwanawo namanqaku ophando asixhenxe, abhalwe ngabo babesaya kuba ngabacebisi bangaphandle bokubhala baseStellenbosch nababefumene uqeqesho kuSharifa. Umqulu uphela ngombhalo ohlekisayo obhalwe ngomnye owayesaya kuba ngumcebisi wangaphandle wokubhala wangaphambili wobugcisa. Uyichaza le Lebhu yokuBhala njengendawo yokufunda yoluntu, apho kwakwamkeleke uwonkewonke. Ukuba ungathanda ukwazi ngakumbi ngesi sithuba sobubele, nceda uthumele i-imeyili ku amlackay@sun.ac.za okanye utsalelele umnxeba uAnne-Mari Lackay ku 021 808 2928.

Olu shicilelo lukhethekileyo lwapapashwa njengoMqulu wama-57(2019) kuMaxwebhu wamaphepha-ndaba aqinisekisiweyo kweeZeelwimi aseStellenbosch. (iStellenbosch Papers in Linguistics Plus (SPiL Plus).

Writing Lab comic by Neeske Alexander, an artist and former writing consultant.

4 March 2020Tags: social justice, Struggle, writing centres, Writing Lab

Utoliko kwi-Woordfees

Ukuba iliso lakho besele lidibene nencwadana ye-Woordfees yalo nyaka – nje ngabalandeli be-Woordfees abaninzi – ungabe ubukhe wadibana nentengiso yeZiko leeLwimi kunye neengcebiso zokubuza indlela ngesiXhosa. Elo phepha liphela ngentetho ethi “Izinto ezinkulu ziyenzeka xa usebenzisana nathi.” Kambe i-Woordfees isebenzisana nathi ngokwenene kwakhona kulo nyaka – ukwenza isiqinisekiso sokuba utoliko lwangaxesha-linye lusilungele isiphithiphithi esiluthotho lweengxoxo.

I-Woordfees iyaqala ngomhla we-5 kweyoKwindla kulo nyaka kwaye, ngaphandle kwemisitho yethiyetha, ababhali nomculo, kuza kubanjwa neeseshoni ezahlukahlukeneyo nalapho usomlomo eza kukhuthaza abaphulaphuli ukuba babe yinxalenye yeengxoxo. Kwaye ukutyebisa la mathuba onxibelelwano, iitoliki zeZiko leeLwimi ziza kubakho kwiiseshoni eziliqela kwezi ukuze zitolike – simahla – (ingakumbi) zitolikela kwisiNgesi okanye kwisi-Afrikansi.

U-Edward de Kock, omnye weetoliki zeZiko leeLwimi, uya kukhumbula ukuqalwa kweli phulo ngo-2018: “Yaba sisicelo esithabathekisayo kwaye esenza imincili. Kwakubakho uthotho lweengxoxo ezazisenzeka yonke imihla ententeni phambi kwe-Wilgenhof. Kwaye kwafuneka ukuba sifumane isitulo eside sepikniki, sigqithise izixhobo zotoliko size sitolike bonke obo bungqina bunika umdla kwaye buchukumisayo – size siphikisane nokulangazelela kwethu ukungabandakanyeki ngokunokwethu! Ukutolikela i-Woordfees kube lithuba endililangazelela ngokwenene.”

Utoliko aluyi kwenzeka kuzo zonke iiseshoni zeengxoxo ngenxa yezizathu zocwangciso kodwa akhona amathuba okuba ungadibana netoliki endaweni ethile ngexesha elithile. Qaphela abantu abaphethe ibhokisi yezixhobo, abadla ngokuba kufuphi neqonga, nabavamise ukuba noncumo olukhulu. Yiza uzokubulisa – kwaye uyisebenzise le nkonzo yasimahla. Uyonwabele i-Woordfees!

Wagging tongues and interpreting at the Woordfees

4 March 2020Tags: discourse series, interpreting, Woordfees

Nangona kuncomeka nje ukuthi cwaka, maxawambi kungangonwabisi

Kwabaninzi ixesha lemibhiyozo yangeeholide zehlobo lihambisana kunye neentlangano zosapho. Kwangaxeshanye, kungumthetho ongabhalwanga ukuba uzakuphikisana nesalamane esingasondelanga kuwe okanye – okubi nangakumbi –nisuke nje niphelelwe zizinto eninokuzithetha. Kutsho kuthi cwaka kuphel’ ulonwabo… Ngo-2010, abaphandi-nzulu beYunivesithi yaseGroningen ababeqwalasele umba ongokuthi cwaka ngelixa kuncokolwa baye bafumanisa ukuba kuthatha malunga nemizuzwana emine ukuba ukuthi cwaka kunganyamezeleki. Kuzakuthiwani ke ngoku? Ukuphengulula i-intanethi ufuna izisombululo zokuthintela ukuthi cwaka okwenza ukungonwabi kuveza imfumba yeziphumo, kodwa iimpendulo zivamise ukugxila kwiincoko kunye nabantu ongabaziyo okanye abantu osebenza nabo, hayi amalungu osapho lwakho. Oku ngonwabi kungaqina nangakumbi xa ubuza uMzala uLee ukuba “Usuka phi umthetho wakho?” okanye, “Uzokwenza ntoni apha?”. Kodwa noxa kunjalo zikhona iimbono ezintle kumanye amanqaku, njengecebo lencutshe yonxibelelwano uVictor Sander lokusebenzisa ‘imibuzo engowena’. Elona cebo apha kukubuza imibuzo enegama elingu’wena’ kuyo, umzekelo “Yintoni oyenzayo wena ngexesha lakho ongasebenziyo ngalo?”. USanders uthi ngokwenza oku ubonakalisa umdla kolo mntu uthetha naye, nto leyo ivamise ukwenza ukuba lo mntu uthetha naye azinikele ngakumbi kwincoko yenu. UMelissa Dahl, umbhali kaCringeworthy: A Theory of Awkwardness, yena ucebisa ukuba ukuthi cwaka akuyonto ifanele ukuba yoyikwe. UDahl waye wafumanisa ukuba isizathu sokuba ukuthi cwaka kuvakale kungonwabisi kukuba kukho amaqondo aphezulu okungaqiniseki. Abantu bavamise ukungayithandi into yokungayazi into elandelayo abazakuyenza okanye abazakuyithetha. Xa ukwazi oko, kusele nje ukuba ufumane into ozakuqiniseka ngayo kuphela… Qiniseka ukuba usapho lwakho luyakuthanda, qiniseka ukuba ayomini yakho yokuhlamba izitya, kwaye yazi ukuba emva kwenye iglasi yewayini, uMakazi uRachel uzakuqalisa ukuthetha ngenja yakhe.

27 November 2019Tags: silence