Leer ons ken deur die boeke wat ons lees! Vandeesmaand gesels ons met Helga Sykstus. Helga bestuur die Taalsentrum se Taalleerhub en is ʼn spesialis op die gebied van taalverwering in Afrikaans. Sy bied ook akademiesegeletterhedemodules aan.
“Ek deel al vir 22 jaar my passie vir Afrikaans, maar ook vir taal en kultuur in die breë, met my studente en kliënte. Ek onderrig Afrikaans op verskillende vlakke, van beginner- tot akademiese vlak, en hoop om deur taal nie net te bemagtig nie, maar ook bande tussen mense te smee.”
Wat is die titel van jou gunstelingboek, of ʼn boek wat ʼn diep indruk op jou gemaak het, of ʼn boek wat jy om die een of ander rede as onvergeetlik ervaar het?
When the Moon is Low deur Nadia Hashimi.
Hoekom het hierdie boek jou só beïndruk?
Ek stel baie belang in die verhale van Afghaanse vroue omdat dit soveel van my realiteit verskil en ek veral hul innerlike krag, ten spyte van komplekse en moeilike lewensomstandighede, bewonder en inspirerend vind. Dit is ook nie net verhale wat in boeke afspeel nie, maar die werklikheid vir soveel vroue en kinders in Afghanistan.
Die verhaal gaan oor ʼn vrou, Fereiba, wat met haar drie kinders uit Kabul moet vlug vanweë vervolging deur die Taliban. Sy besluit om na familie in Londen te vlug en pak ʼn gevaarlike reis deur Iran, Turkye en Griekeland aan. Haar oudste seun, Saleem, word egter in Athene in hegtenis geneem en van die res van die gesin geskei.
Hierdie boek het my op ‘n ander manier laat kyk na veral die pyn en hartseer wat met immigrasie gepaard gaan. Die verhaal van vlugtelinge en migrante wat sukkel om van ellende en ‘n spoedige dood te ontkom, vang die werklikheid vas van wat dit beteken om ʼn immigrant te wees. Die skrywer beeld dit uit op ‘n manier wat onder jou vel inkruip en jou diep roer. Ek moes die boek elke nou en dan vir ʼn paar dae laat lê omdat dit te moeilik was om verder te lees. Die verhaal ruk aan die hart.
Wie is jou gunstelingouteur(s)? Hoe só?
Gabriel Garcia Marquez en Isabel Allende omdat ek mal is oor hul subtiele gebruik van ʼn magiese realisme, en Khalid Hosseini vir sy diep en ryk uitbeelding van Afghanistan.
Wat lees jy op die oomblik?
Ek lees Inspire: Life Lessons from the Wilderness deur Ben Fogle.
Ek het ʼn paar jaar gelede verlief geraak op Ben Fogle se program Where the wild men are, wat gaan oor mense wat gekies het om ʼn lewe in die samelewing te verruil vir ʼn afgesonderde lewe in die natuur. Die soeke na ʼn rustiger, eenvoudiger lewe het my nog altyd aangegryp en dit is ook die rede hoekom ek besluit het om hierdie boek te koop. Fogle deel sy eie lewenslesse asook dié van ander wat nader aan die natuur leef. Die boodskap wat hy voor in vir my geskryf het, is: “Dear Helga. Don’t stop dreaming and take the leap.”
Verkies jy dit om ‘regte’ gedrukte boeke te lees, of lees jy eerder boeke op ʼn Kindle of ʼn ander elektroniese platform? Wat is die rede vir jou voorkeur?
Definitief ‘regte’ gedrukte boeke. Ek wil ʼn boek vashou, die bladsye ruik en dit uitpak in my boekrak sodat ek altyd herinner word aan die wonderlike verhale wat ek al gelees het.
Watter boek het jy al meer as een keer gelees? Vertel ons hoekom?
Ek lees nie boeke twee keer nie, omdat daar te veel is om te lees.
Wie is jou gunsteling- literêre karakter?
Ek het nie ʼn gunsteling- literêre karakter nie.
Het jy dalk ʼn lewensles uit ʼn boek of by ʼn karakter uit ʼn boek geleer wat jy met ons wil deel, as jy dit nog nie in een van jou ander antwoorde genoem het nie?
Meeste boeke wat ʼn indruk op my maak, gaan oor die innerlike krag en uithouvermoë van die mens, die liefde vir ander, die liefde vir kultuur en die natuur.
Die les wat ek daaruit leer, is om bewus te wees van die klein dingetjies wat elke dag om my gebeur en dit ten volle in te neem.”
Watter boek of boeke kan jy by jou vriende, studente en enige iemand anders aanbeveel?
- The House of Spirits – Isabel Allende
- Love in the Time of Cholera – Gabriel Garcia Marques
- The Good Daughter – Jasmin Darznik
- Salt Houses – Hala Alyan
- A Thousand Splendid Suns – Khalid Hosseini
- A Walk Across the Sun – Corban Addison
