Leer ons ken deur die boeke wat ons lees! Vandeesmaand gesels ons met Jackie van Wyk, ʼn opvoedkundige tolk by die Taalsentrum se Tolkdiens.
“Ek het tale aan die US studeer en werk al vir 15 jaar by die Taalsentrum as dosent en opvoedkundige tolk. Dit is vir my baie vervullend om my liefde vir taal, kommunikasie en onderrig te kombineer in my rol as tolk. Verder stel ek belang in persoonlike ontwikkeling, kindersielkunde, entrepreneurskap, ouerskap en musiek – ek speel tromme.”
Wat is die titel van jou gunstelingboek, of ʼn boek wat ʼn diep indruk op jou gemaak het, of ʼn boek wat jy om die een of ander rede as onvergeetlik ervaar het?
ʼn Boek wat my bybly vandat ek dit die eerste keer gelees het, is The History of Rasselas, Prince of Abissinia, deur Samuel Johnson. Dit was ʼn voorgeskrewe boek vir English Studies toe ek voorgraads studeer het en ek onthou hoe ek en my twee vriendinne een reënerige Saterdag daaraan gewy het om die boek saam te bestudeer as voorbereiding vir die eksamen. Dit het ons so vier ure geneem om die boek om die beurt vir mekaar voor te lees, en ek onthou steeds hoe die storie my ingetrek het. Tot vandag toe nog verwys ek nog na Rasselas se verhaal – ek het dit selfs al gebruik in ʼn toespraak by ʼn troue!
Hoekom het hierdie boek jou só beïndruk?
Die boek ondersoek ʼn kritiese lewensvraag: kan die mens geluk vind? Dit vertel die verhaal van ʼn keiser se seun, Rasselas, wat wag op sy beurt om die troon te bestyg. Intussen woon hy, sy sibbe en vele ander in ʼn koninkryk genaamd Happy Valley waar alles perfek is. Die natuurskoon is asemrowend, daar is geen tekort aan rykdom, vermaak, vreugde en vrede nie en niemand benodig enigiets nie. Ten spyte daarvan dat hierdie paradys geluk behoort te waarborg, is Rasselas ongelukkig. Hy kom tot die slotsom dat dit juis die gebrek aan behoefte is wat hom pla. Soos hy dit stel: “I have already enjoyed too much; give me something to desire.” Hy en ʼn groepie ander besluit om te ontsnap uit die vallei om die wêreld daar buite eerstehands te ervaar. Die idee is om daarna ʼn ingeligte besluit te maak oor waar hy die gelukkigste sal wees. Hy maak dit ook sy missie om te sien wie dit reggekry het om ware geluk te vind en soek dit by almal wat hy ontmoet. Ná hulle reis wat meer as ʼn jaar duur, besluit Rasselas egter om terug te keer na die vallei. Die einde word as ʼn antiklimaks beskou omdat hulle die vallei so ongelukkig verlaat het en soveel planne gemaak het om voortaan gelukkig te wees. Tog sê die einde vir my baie. Dit spreek tot die idee dat geluk nie iets is wat jy vind in ʼn plek, mense, beroep of aksies nie. Geluk is iets wat jy self binne jou vestig en dit kan saam met jou gaan; dit maak nie saak waar jy is of saam met wie jy is nie. Die verhaal van Rasselas bevraagteken ook in der waarheid die hele idee van ‘ware’ of ‘volkome’ geluk in hierdie lewe.
Per slot van rekening is die lewe tog ook ʼn reis: “Distance has the same effect on the mind as on the eye, and while we glide along the stream of time, whatever we leave behind us is always lessening, and that which we approach increasing in magnitude.”When all is said in done, life is also a journey: “Distance has the same effect on the mind as on the eye, and while we glide along the stream of time, whatever we leave behind us is always lessening, and that which we approach increasing in magnitude.”
Wie is jou gunstelingouteur(s)? Hoe só?
Ek het nie gunstelingouteurs nie, maar ek geniet ongewone verhale waar die grens tussen fiksie en realiteit vervaag. Ek geniet ook sielkundige rillers, maar as ek net wil ontspan, sien ek geensins neer op ʼn lekker liefdesverhaal nie.
Wat lees jy op die oomblik?
Ek het twee jong kinders en is swanger, so ek het regtig nie in hierdie lewensfase eintlik tyd vir lees nie. Maar ek geniet dit baie om vlogs op YouTube te kyk en ek daar is ʼn paar gesinne wat ek volg, onder meer Bonnie Hoellein, Ellie and Jared, en Elle Lindquist.
Verkies jy dit om ‘regte’ gedrukte boeke te lees, of lees jy eerder boeke op ʼn Kindle of ʼn ander elektroniese platform? Wat is die rede vir jou voorkeur?
Altyd regte gedrukte boeke vir my. Ek is te veel op skerms andersins.
Watter boek het jy al meer as een keer gelees? Vertel ons hoekom?
Ek het nog nooit fiksie meer as een keer gelees nie, maar ek verwys gereeld na ander nie-fiksie boeke soos Groeipyne deur Johan van Lill, en 5 Tale van die Liefde van Kinders deur Gary Chapman en Ross Campbell, en ek vind dit baie waardevol om gereeld Ontsluit die Legkaart van die Bybel deur Bill Jones te lees.
Wie is jou gunsteling- literêre karakter?
Ek onthou nie regtig karakters in stories nie, meer die gebeure en die details van die interaksies.
Watter boek of boeke kan jy by jou vriende, studente en enige iemand anders aanbeveel?
- The Seven Days of Peter Crumb deur Jonny Glynn
- Where the Crawdads Sing deur Delia Owens
- The Holiday deur Erica James
- Ontsluit die Legkaart van die Bybel deur Bill Jones
