Boekgeselsie met Vernita B
Leer ons ken deur die boeke wat ons lees! Vandeesmaand gesels ons met Vernita Beukes, ʼn dosent en koördineerder van taalverwerwingskursusse by die Taalsentrum. Sy sê: “Ek het regtig die beste werk in die wêreld! Ek kry as deel van my werk die geleentheid om vir internasionale studente van regoor die wêreld Afrikaans te leer. Hulle sê mos nie verniet dat as jy doen wat jou passie is, jy nooit ʼn dag in jou lewe sal hoef te werk nie! Ek is ook betrokke by die voorleesprojek van die Vriende van Afrikaans. Hier kry ek die geleentheid om vir kinders in kleuterskole voor te lees! Hoe gelukkig is ek?”
Ek is mal oor my man, hond en familie en vriende, en lees en reis is bo-aan my lysie van dinge wat ek graag doen. “Daar is net een ding wat ek haat en dit is tamaties!” bieg sy.
Wat is die titel van jou gunstelingboek, of ʼn boek wat ʼn diep indruk op jou gemaak het, of ʼn boek wat jy om die een of ander rede as onvergeetlik ervaar het?
Lees was nog altyd deel van my lewe. My ma het elke dag vir ons voorgelees. Van sub A (graad een) af het ek ook ongelooflike onderwysers gehad wat my liefde vir boeke en lees net nog verder aangewakker het. Ek was ʼn onderwysstudent en dr Anker het vir ons Die Klein Prinsie deur Antoine de Saint-Exupéry voorgelees. Afgesien van sy mooi stem het die waarhede in daardie boek my ook diep getref.
Hoekom het hierdie boek jou só beïndruk?
Die gedeelte in die boek op bladsy 72 (in my weergawe, in elk geval) het my lewensfilosofie geraak. In daardie aanhaling verduidelik die jakkals vir die Klein Prinsie dat dit net met die hart is wat jy werklik kan sien. Wat regtig belangrik is, is onsigbaar vir die blote oog.
Ek probeer regtig met my hart na mense luister en kyk.”
Wie is jou gunstelingouteur(s)? Hoe só?
Ek het baie gunstelingouteurs, want ek voel dat op sekere stadiums in jou lewe sekere outeurs meer met jou praat. Jojo Moyes het my al die ugly cry laat doen en John Grisham, Clive Cussler en Sofia Segovia het weer my laat verdwyn in hulle wêrelde.
Wat lees jy op die oomblik?
Ek lees op die oomblik twee boeke: The Help deur Kathryn Stockett en The Murmur of Bees deur Sofia Segovia.
Verkies jy dit om ‘regte’ gedrukte boeke te lees, of lees jy eerder boeke op ʼn Kindle of ʼn ander elektroniese platform? Wat is die rede vir jou voorkeur?
Niks, maar niks kom naby die reuk van ʼn nuwe boek nie.
Watter boek het jy al meer as een keer gelees? Vertel ons hoekom?
Die Klein Prinsie, onder andere, omdat dit my gunstelingboek is en die waarhede daarin my elke keer opnuut tref.
Wie is jou gunsteling- literêre karakter?
Claire Randall van die Outlander-reeks. Sjoe! Om in Skotland te woon kan nogals vir my werk!
Watter boek of boeke kan jy by jou vriende, studente en enige iemand anders aanbeveel?
- The Giver of Stars deur Jojo Moyes
- Evening Class deur Maeve Binchy
- Sophie’s World deur Jostein Gaarder
Dr Seuss se Cat in the Hat-karakter (kopiereg: Random House)